तरुणीवर बलात्कार; आठ नराधमांना दुहेरी जन्मठेप

शहरातील एका महाविद्यालयीन तरुणीवर सामूहिक बलात्कार केल्याप्रकरणी 11 आरोपींना जिल्हा व सत्र न्यायाधीश एस. व्ही. केंद्रे यांनी शिक्षा सुनावली आहे. यातील 8 आरोपींना दुहेरी जन्मठेप, तर तीन आरोपींना 20 वर्षे कारावासाची शिक्षा सुनावण्यात आली आहे.

सचिन श्रीकांत राठोड, प्रवीण श्रीकांत राठोड, गणेश ऊर्फ अक्षय विष्णू चव्हाण, करण विजयकांत भरले, गौरव विलास भोसले, राज ऊर्फ राजकुमार सिद्राम देसाई, दिनेश परशु राठोड, सतीश अशोक जाधव, आनंद राम राठोड, रोहित शाम राठोड, चेतन राम राठोड अशी शिक्षा झालेल्या आरोपींची नावे आहेत. यात 4 रिक्षाचालक असून, आरोपी हे विजापूर रोडवरील प्रतापनगर, सोरेगाव, एस. टी. कॉलनी आरटीओ ऑफिसजवळ व निराळे वस्ती येथे राहणारे आहेत.

सोलापूर जिह्यात गाजलेल्या या खटल्याची हकीकत अशी की, पीडित मुलगी ही अल्पवयीन व महाविद्यालयीन शिक्षण घेणारी आहे. तिची सचिन श्रीकांत राठोड (वय 24) या रिक्षाचालक तरुणाशी ओळख झाली होती. ओळखीनंतर त्या दोघांचे प्रेमसंबंध जुळले. राठोड याने लग्नाचे आमिष दाखवून तिच्यावर वेळोवेळी लॉजवर नेऊन बलात्कार केला. त्यानंतर राज देसाई या रिक्षाचालकाने रंगभवन येथून पीडित मुलगी घराकडे जात असताना तिला रिक्षातून नेऊन सार्वजनिक मैदानात तिच्यावर बलात्कार केला.