महायुतीतील अजित पवार गटाने त्यांचा जाहीरनामा नुकताच प्रसिद्ध केला आहे. या जाहीरनाम्यावरून राष्ट्रवादी काँग्रेस शरदचंद्र पवार पक्षाचे खासदार अमोल कोल्हे यांनी अजित पवार यांना जबरदस्त टोला लगावला आहे. या जाहीरनाम्यात त्यांनी जनतेला अनेक आश्वासने दिली आहेत. याबाबत बोलताना कोल्हे म्हणाले की, मला वाटते त्यांच्या जाहीरनाम्यात प्रिंटिंग मिस्टेक आहे. त्यात एक ओळ छापायची राहून गेली की, आम्ही तुम्हाला चंद्र आणून देऊ, असा टोला अमोल कोल्हे यांनी अजित पवार गटाला लगावला आहे.
महायुतीची ही आश्वासने केवळ पोकळ दावा आहे. सत्तेत येणार नाही, हे माहीत असल्याने, वाट्टेल ती आश्वासने द्यायची, हेच या जाहीरनाम्यातून स्पष्ट दिसते, असेही कोल्हे म्हणाले. यावेळी कोल्हे यांनी लाडकी बहिण योजनेवरूनही महायुतीवर चांगलाच निशाणा साधला. लोकसभेला मतांची झाली कडकी, म्हणून आता बहीण त्यांची लाडकी झाली. लाडकी बहीण योजनेची घोषणा करताना, त्याची बजेटमध्ये तरतूद आहे का? हा प्रमुख प्रश्न आहे. तसेच स्थिती ज्येष्ठ नागरिकांसाठी असलेल्या पेन्शन योजनेची आहे. या योजनांना आमचा विरोध नाही. मात्र, वस्तुस्थितीकडे लक्ष देणे गरजेचे आहे,असेही कोल्हे म्हणाले. अनेक योजनांचा निधी, हा ठराविक योजनांकडे वळवण्यात आला आणि सर्व योजना वाऱ्यावर सोडण्यात आल्या. काही जीवनावश्यक वस्तूंचे दर स्थिर ठेवण्याचे जे आश्वासन देण्यात आले. ते तर हासयस्पद आहे. राज्याचे अर्थमंत्री एकाही जीएसटी परिषदेला उपस्थित राहिले नाहीत. तर मग ते कोणत्या जीवनावश्यक वस्तूंचे दर स्थिर ठेवणार आहेत, असा सवाल करत कोल्हे यांनी महायुतीवर निशाणा साधला.
Comment List