धारावी पुनर्वसन प्रकल्पासाठी जमिनीचा सर्व्हे करण्याकरिता मालाड पश्चिम येथील अक्सा गावामध्ये आलेल्या प्रशासनाच्या कर्मचाऱ्यांना आज गावकऱ्यांनी अक्षरशः हुसकावून लावले. यावेळी गावकरी प्रचंड आक्रमक झालेले दिसले.
धारावीचा पुनर्विकास अदानीमार्फत करण्यात येणार आहे. अपात्र धारावीकरांचे मालाडमध्ये पुनर्वसन करण्याचा निर्णय अलीकडेच राज्य सरकारने घेतल्याने मढ, भाटी, एरंगळ, अक्सा, मार्वे, मालवणी येथील स्थानिक गावकऱ्यांचा याला विरोध आहे. असे असतानादेखील धारावी पुनर्वसन प्रकल्पासाठी जमिनीचा सर्व्हे करण्याकरिता प्रशासनाचे अधिकारी आले होते.
स्थानिक आमदार अस्लम शेख यांच्या नेतृत्वाखाली एकत्र येत गावकऱ्यांनी अधिकाऱ्यांना हुसकावून लावले. त्यानंतर गावकऱ्यांना सोबत घेऊन अस्लम शेख यांनी थेट मालवणी पोलीस ठाणे गाठले.
भूमिपुत्रांच्या जमिनी अदानीच्या घशात जाऊ देणार नाही
राज्यात आचारसंहिता लागू असताना पोलीस बंदोबस्तात प्रशासनाचे अधिकारी जमिनीचा सर्व्हे करण्यासाठी येतात आणि ग्रामस्थांवर दबाव टाकतात हे कितपत योग्य आहे. आमच्या कोळी बांधवांच्या जमिनी गिळंकृत करण्याचं षड्यंत्र रचलं जातंय, मात्र हे सरकारी षड्यंत्र मी कदापि यशस्वी होऊ देणार नाही. आशीष शेलार यांना जर हा प्रकल्प हवा असेल तर त्यांनी तो वांद्रय़ात घेऊन जावा, मात्र मी माझ्या भूमिपुत्रांना उद्ध्वस्त होऊ देणार नाही, अशी ठाम भूमिका अस्लम शेख यांनी मांडली.
Comment List