दख्खनचा राजा श्री जोतिबाच्या चैत्र यात्रेत भाविक तल्लीन; पारंपरिक वाद्यांच्या गजरात गगनचुंबी सासनकाठ्यांच्या मिरवणुकीस सुरुवात

महाराष्ट्र, गोवा, कर्नाटक, गुजरात, आंध्र प्रदेशसह देशभरातील कोट्यावधी भाविकांचे श्रद्धास्थान असलेल्या पन्हाळा तालुक्यातील वाडी रत्नागिरी येथील दख्खनचा राजा श्री जोतिबा देवाची आज चैत्र पौर्णिमा यात्रा लाखो‌ भाविकांच्या मांदियाळीत पार पडत आहे. यासाठी जोतिबा डोंगरावर कालपासूनच तब्बल पाच लाखाहून अधिक भाविक दाखल झाले आहेत. आज यात्रेच्या मुख्य दिवशी तर पारंपारिक वाद्यांच्या तालावर उंचच उंच सासनकाठ्या नाचवत, गुलाल खोबऱ्यांची मुक्त उधळण करत जोतिबाच्या नावानं चांगभलंच्या अखंड जयघोषात अबालवृद्ध भाविक रणरणत्या उन्हाची पर्वा न करता तल्लीन झाले होते.

यात्रेच्या आज मुख्य दिवशी पहाटे तीन वाजता घंटानाद होऊन धार्मिक विधीला सुरूवात झाली. पहाटे पाच वाजता शासकीय अधिकाऱ्यांच्या उपस्थितीत महाभिषेक महापूजा तर 10 वाजता धुपारती सोहळा पार पडला. दुपारी एकच्या सुमारास पालकमंत्री प्रकाश आबीटकर तसेच जिल्हाधिकारी अमोल येडगे यांच्या उपस्थितीत मानाच्या सासनकाठींच्या मिरवणुकीस सुरुवात झाली. तर हस्तनक्षत्रावर सायंकाळी 5.30 वाजता श्री जोतिबाचा पालखी सोहळा पारंपरिक पद्धतीने होणार आहे.

तीन दिवसांच्या यात्रेतील आजचा मुख्य दिवस असून पहाटे 3 वाजता घंटानाद, काकड आरती, पाद्यपूजा, मुखमार्जन हे विधी संपन्न झाले. पहाटे 5 वाजता शासकीय महाअभिषेक करण्यात आला. त्यानंतर देवाची पारंपारिक राजदरबारी बैठी अलंकार महापूजा बांधण्यात आली. दुपारी 1 च्या सुमारास पालकमंत्री प्रकाश आबिटकर, जिल्हाधिकारी अमोल येडगे यांच्या हस्ते मानाच्या सासनकाठीचे पूजन झाले. देवस्थान कमिटीचे म्हालदार, चोपदार व तोफेच्या सलामीने सासनकाठीच्या मिरवणुकीस सुरुवात झाली. यासाठी मानाच्या 108 सासनकाठ्या जोतिबावर दाखल झाल्या असून चांगभलंच्या गजराने अवघा डोंगर दुमदुमून गेला आहे.