शहरातील मध्यवर्ती स्वारगेट एसटी स्थानकात तरुणीला धमकावून बलात्कार करणारा आरोपी दत्तात्रय गाडे हा पोलिसांचा गणवेश परिधान करून एसटी स्थानकाच्या आवारात फिरत असल्याची माहिती तपासात मिळाली आहे. त्याने पोलिसांचा गणवेश परिधान केलेले छायाचित्र पोलिसांना मिळाले असून त्यादृष्टीने पोलिसांनी तपासाला गती दिली आहे.
पुण्यातील शिवाजीनगर, स्वारगेट, अहिल्यानगर, सोलापूर, तसेच शिरूर एसटी स्थानकात आरोपी दत्तात्रय गाडे हा फिरत असल्याचे तपासात उघडकीस आले होते. त्याच्याविरुद्ध तक्रार असल्यास पोलिसांशी संपर्क साधण्याचे आवाहन केले आहे. दरम्यान, गाडेच्या ओळखीचा एक जण पिंपरी-चिंचवड शहर पोलीस दलात कार्यरत आहे. गाडेने त्याचा वेश परिधान करून छायाचित्र काढल्याचे उघडकीस आले. आरोपी गाडे याच्याविरुद्ध यापूर्वी पुणे ग्रामीण, अहिल्यानगर परिसरात ज्येष्ठ महिलांना लुटण्याचे गुन्हे आहेत.
जास्तीत जास्त पुरावे गोळा करण्याचे काम सुरू
डीएनए चाचणीसाठी आरोपीच्या रक्ताचे नमुने ताब्यात घेण्यात आले आहेत. गुन्हा करताना गाडेने वापरलेले कपडे पोलिसांनी जप्त केले आहेत. ते कपडे न्यायवैद्यक प्रयोगशाळेत तपासणीसाठी पाठविण्यात आले आहेत.
Comment List