केंद्रीय गृहमंत्री अमित शहा यांनी आज मराठय़ांच्या इतिहासावर आक्रमण केले. महाराष्ट्राचे आराध्य दैवत, हिंदवी स्वराज्य संस्थापक छत्रपती शिवाजी महाराज यांच्याविषयी प्रचारसभेत बोलताना शहा भरकटले आणि त्यांनी एक भाकडकथा सांगितली. ‘समर्थ रामदासांनी तरुणांना एकत्र करून छत्रपती शिवाजी महाराजांना पाठिंबा देण्याचे काम केले,’ असे विधान शहा यांनी केले. शहा यांनी इतिहासाचा विपर्यास केल्यामुळे महाराष्ट्रात शिवप्रेमींमध्ये संतापाची लाट उसळली असून, शहा आणि भाजपचा सर्वत्र निषेध व्यक्त होत आहे. इतिहास संशोधकांनी शहांच्या विधानाचा निषेध करीत तीव्र आक्षेप नोंदविला आहे.
राज्यात विधानसभा निवडणुकीची रणधुमाळी सुरू आहे. आज सांगली जिह्यातील बत्तीस शिराळा येथे भाजप उमेदवारांच्या प्रचारार्थ गृहमंत्री अमित शहांची सभा पार पडली. यावेळी भाषणात अमित शहा म्हणाले, ‘समर्थ रामदासांचे पाऊल जिथे पडले ती ही पवित्र भूमी आहे. रामदासांनी गुलामीच्या काळात तरुणांना एकत्र करून छत्रपती शिवाजी महाराजांना पाठिंबा देण्याचे कार्य केले’ इतिहासाशी छेडछाड करणाऱ्या अमित शहांच्या या वक्तव्याचे तीव्र पडसाद उमटत आहेत.
दादा गटानेही फटकारले
अमित शहांच्या वक्तव्यावरून महायुतीतील अजित पवार गटानेही फटकारले आहे. छत्रपती शिवाजी महाराजांच्या इतिहासाबद्दल अमित शहांनी केलेले वक्तव्य अत्यंत चुकीचे आहे. महाराष्ट्रात त्यांना स्क्रिप्ट कोणी लिहून दिली हे शोधलं पाहिजे. बाहेरून येणाऱ्यांनी शिवचरित्राचा अभ्यास केल्याशिवाय बोलू नये असे अमोल मिटकरी यांनी ‘एक्स’द्वारे म्हटले आहे.
शिराळ्याची सभा ठरली ‘फ्लॉप शो’
शिराळा येथील गृहमंत्री अमित शहा यांच्या सभेचा मोठा गाजावाजा भाजप महायुतीने केला होता. परंतु ही सभा फ्लॉप शो ठरली. शिराळा आणि सांगली जिल्हय़ातील नागरिकांनी सभेकडे पाठ फिरवली. मैदान ओस पडले होते. खुर्च्या रिकाम्या होत्या. यामुळे भाजप नेते हादरले आहेत.
हे पटणारे नाही… संभाजीराजेंनी सुनावले
संभाजीराजे छत्रपती म्हणाले, छत्रपती शिवाजी महाराज आणि संत रामदास यांना तुम्ही जर जोडलं किंबहुना आणि कोणी त्यांना गुरु म्हणत आहेत तसं होऊ शकत नाही. शिवाजी महाराज यांचे एकच गुरु ते आहेत. जिजाऊ माँसाहेब म्हणून त्यांचं महत्त्व आहे त्या ठिकाणी असावं. त्यांच्या महत्त्वाला आम्ही चॅलेंज करत नाही, पण शिवाजी महाराज यांना जोडायचं हे न पटणारं आहे.
ही तर भाकडकथा… इंद्रजित संतापले
शिवरायांनी जिजाऊ व शहाजीराजांकडून प्रेरणा घेत स्वराज्य स्थापनेची सुरुवात केली होती. 1642 ते 1672 या कालावधीत शिवरायांच्या संबंधांमध्ये समर्थ रामदासांचे नाव कागदपत्रांमध्ये कुठेही नोंदवलेलं नाही. रामदासांनी तरुणांना शिवरायांना पाठिंबा द्यायला सांगितले ही भाकडकथा आहे. शहांच्या विधानामागे भाजप व संघाची व्यूहरचना आहे, असा आरोप इंद्रजित सावंत यांनी केला.
Comment List