सत्ताधाऱ्यांचा उदोउदो करणाऱ्या वर्तमानपत्रातील सरकारी योजनांच्या जाहिरातींना उच्च न्यायालयाने चांगलीच चपराक दिली आहे. अशा जाहिरातींची तक्रार करण्यासाठी व त्यावर कारवाई करण्यासाठी समितीची स्थापना करा, असे आदेश न्यायालयाने राज्य शासनाला दिले आहेत.
सरकारी योजनांच्या जाहिरातींमध्ये केवळ सत्ताधाऱ्यांचे फोटो झळकत असतील व त्यांचेच गुणगान गायले जात असेल तर कशातच पारदर्शकता राहणार नाही. सरकारी योजनांच्या जाहिरातींसाठी जनतेच्या पैशांचा गैरवापर करू नये. या सर्वांवर अंकुश ठेवण्यासाठी प्रत्येक राज्याने समिती स्थापन करावी, असे आदेश सर्वोच्च न्यायालयाने दिले आहेत. ही समिती स्थापन करण्यात महाराष्ट्राने पिछाडीवर राहण्याचे काहीच कारण नाही, असेही न्या. एम. एस. सोनक व न्या. जितेंद्र जैन यांच्या खंडपीठाने नमूद केले.
राज्य शासनाचा दावा
सर्वोच्च न्यायालयाच्या निर्देशानुसार 2018 मध्ये एका समितीची स्थापना करण्यात आली होती. कोरोनानंतर समिती अस्तित्वात राहिली नाही, असा दावा राज्य शासनाने केला.
काय आहे प्रकरण
एडीटर फोरमने अ‍ॅड. सतीश तळेकर यांच्या मार्फत ही याचिका केली आहे. सरकारी जाहिरातींसाठी राज्य शासनाने काही अध्यादेश जारी केले आहेत. या अध्यादेशांचे पालन केले जात नाही. वर्तमानपत्र व न्यूज चॅनल्सला सरकारी योजनांची जाहिरात देताना नियम धाब्यावर बसवले जातात, असा आरोप याचिकेत करण्यात आला आहे. महापालिका, म्हाडा, सिडको, एमआयडीसीकडूनही अशा जाहिराती देताना नियमांची पायमल्ली केली जाते. नियमांचे पालन न करणाऱ्या या संस्था व सरकारी खात्यांवर कारवाई करावी. याच्या चौकशीसाठी आयोग नेमावा, अशी मागणी याचिकेत करण्यात आली आहे.
बारामतीतून युगेंद्र पवार, अजित पवार यांचे अर्ज
बारामती विधानसभा मतदार संघात महाविकास आघाडीचे उमेदवार म्हणून युगेंद्र पवार यांनी साधेपणाने अर्ज दाखल केला. ज्येष्ठ नेते शरद पवार यावेळी त्यांच्यासोबत उपस्थित होते. तर उपमुख्यमंत्री अजित पवार यांनी शक्तिप्रदर्शन करून आपला उमेदवारी अर्ज दाखल केला.
युगेंद्र यांचे कन्हेरी येथील निवासस्थानी मातोश्री शर्मिला यांच्याकडून औक्षण करण्यात आले. ग्रामदैवत कन्हेरीच्या मारुतीचे दर्शन त्यांनी घेतले. त्यानंतर आत्या खासदार सुप्रिया सुळे यांच्यासमवेत त्यांनी शहरातील कसबा येथे छत्रपती शिवाजी महाराज यांच्या पुतळ्याला पुष्पहार अर्पण करून ते प्रशासकीय भवनात दाखल झाले. तेथे शरद पवार यांच्यासह पक्षाचे तालुकाध्यक्ष अ‍ॅड. एस.एन. जगताप, सदाशिव सातव, सतीश खोमणे यांच्या उपस्थितीत त्यांनी निवडणूक निर्णय अधिकारी वैभव नावडकर यांच्याकडे अर्ज दाखल केला.
आजोबा पाठीशी – युगेंद्र
मी गेली काही वर्षे समाजकारणात सक्रीय होतो. पक्षाने उमेदवारी देत मोठी जबाबदारी दिली, त्याचा आनंद आहे. मी राजकारणात नवखा असलो तरी 50 वर्षांहून अधिक राजकीय कारकीर्द असणारे आजोबा शरद पवार माझ्यासोबत आहेत, ही मोठी गोष्ट आहे. बारामतीत अनेक प्रश्न प्रलंबित आहेत. भ्रष्टाचार बोकाळला आहे. गुन्हेगारी वाढली आहे. अशा अनेक प्रश्नांसाठी आपला लढा असेल, असे युगेंद्र पवार म्हणाले.
पवार-पवार आमनेसामने
छत्रपती शिवाजी महाराज यांच्या पुतळ्याला पुष्पहार अर्पण करण्यासाठी युगेंद्र पवार आणि सुप्रिया सुळे हे कसब्यात दाखल झाले. येथूनच उपमुख्यमंत्री अजित पवार यांची रॅली निघणार होती. त्यामुळे अजित पवार गटाचे पदाधिकारी-कार्यकर्ते ढोल-ताशांसह येथे आले होते. युगेंद्र व सुप्रिया सुळे यांच्यासमोर त्यांनी जोरदार घोषणाबाजी केली. ते जाईपर्यंत अजित पवार हे मोटारीत थांबून राहिले. तदनंतर अजित पवार यांनी शिवाजी महाराजांच्या प्रतिमेला पुष्पहार अर्पण केला.
Comment List