सोलापूर कृषी उत्पन्न बाजार समितीच्या प्रशासकपदावर दुसऱ्यांदा फेरनियुक्ती करून घेतलेल्या मोहन निंबाळकर यांची चक्क 24 तासांतच पुन्हा उचलबांगडी झाली आहे. राष्ट्रवादीचे दक्षिण सोलापूरचे नेते डॉ. बसवराज बगले यांनी दाखल केलेल्या तातडीच्या याचिकेवर निकाल देऊन मुंबई उच्च न्यायालयाने निंबाळकर यांच्या नियुक्तीला स्थगिती देत त्यांना तत्काळ पदभार सोडण्याचे आदेश दिले आहेत.
उपसंचालकपदावर कार्यरत असलेल्या मोहन निंबाळकर यांच्या नियुक्तीला हरकत घेऊन त्यांनी केलेल्या नियमबाह्य कामकाजाबद्दल डॉ. बसवराज बगले यांनी पणनमंत्री आणि प्रधान सचिवांकडे पुराव्यासह तक्रारी केल्या होत्या. त्यावर पणन संचालकांचा खुलासा सरकारने मागविला होता. शिवाय जिल्हा उपनिबंधकांच्या परस्पर पत्रव्यवहार करून बेकायदेशीर कामकाजाचा सपाटा लावल्याने त्यांच्याविषयी जिल्हा उपनिबंधकांनीसुद्धा गंभीर आरोपांचा अहवाल सादर केला होता. डॉ. बगले यांच्या आरोपात तथ्य असल्यामुळे सहकार व पणन विभागाचे प्रधान सचिव प्रवीण दराडे यांनी निंबाळकर यांना तत्काळ काढून टाकण्याचे आदेश दिले होते. त्यानुसार निंबाळकर यांना सोलापूर बाजार समितीच्या प्रशासकपदावरून तडकाफडकी हटविण्यात आले होते.
संस्थेच्या कामकाजाबाबत धोरणात्मक निर्णय घेण्याचा अधिकार नसताना मोहन निंबाळकर यांनी हुकूमशाही पद्धतीने पणन संचालकांशी संगनमत करून बेकायदेशीर कामकाज करीत असल्याबद्दल डॉ. बगले यांनी तक्रारी केल्या होत्या. त्याची चौकशी करून कारवाई करा, असे आदेश पणनमंत्री जयकुमार रावल यांनी दिले होते. मात्र, त्याच पणनमंत्र्यांनी पुन्हा निंबाळकर यांचीच फेरनियुक्ती करण्यासाठीचे फर्मान सोडले होते. त्यानुसार निंबाळकर यांनी गुरुवार दि. २० मार्च रोजी सकाळी ११ वाजता एकतर्फी पदभार घेतला होता. मात्र, बगले यांच्या तत्परतेमुळे निंबाळकर यांची अवघ्या २४ तासांत पुन्हा दुसऱ्यांदा उचलबांगडी झाली आहे. त्यामुळे बाजारात पुन्हा खमंग चर्चा सुरू झाली आहे.
मुंबई उच्च न्यायालयात क्र-4073/25 ही आव्हान याचिका दाखल करून तातडीने सुनावणी घेण्याची विनंती डॉ. बगले यांनी गुरुवारी केली होती. त्यानुसार शुक्रवारी सकाळीच न्यायमूर्ती अमित बोरकर यांच्यापुढे युक्तिवाद झाला. युक्तिवादातील महत्त्वाचे मुद्दे, दाखल केलेले पुरावे, जिल्हा उपनिबंधकांचा गंभीर व वस्तुनिष्ठ अहवाल आणि शासनाने केलेली चूक लक्षात घेऊन मोहन निंबाळकर यांच्या नियुक्तीच्या आदेशाला न्यायमूर्तींनी स्थगिती दिली आणि दोन आठवड्यांत निंबाळकरांच्या नियुक्तीबाबत प्रतिज्ञापत्र दाखल करण्याचे निर्देश शासनाला दिले आहेत. प्रशासक निंबाळकरांना तत्काळ बाजार समितीचा पदभार सोडण्याचे आदेश दिले आहेत. यावेळी डॉ. बगले यांच्या वतीने अॅड. गुरबाळा बिराजदार यांनी काम पाहिले.
नाकावर टिच्चून घेतला पदभार
पणन विभागाचे उपसचिव संतोष देशमुख यांनी आदेश काढून निंबाळकर यांना कार्यमुक्त केले होते. शहर उपनिबंधक प्रगती बागल यांची प्रशासकपदावर नियुक्ती केली होती. मात्र, निंबाळकर यांनी पणनमंत्री जयकुमार रावल यांच्याकडून नियमबाह्य पद्धतीने नेमणूक करून घेतली. अक्कलकोटचे आमदार सचिन कल्याणशेट्टी यांचे बळजबरीने शिफारसपत्र घेऊन पणन विभागाच्या प्रधान सचिवांच्या नाकावर टिच्चून पुन्हा दुसऱ्यांदा खुर्ची काबीज केली होती. सोलापूर बाजार समितीच्या प्रशासकपदाचा एकतर्फी पदभार गुरुवारी सकाळीच घेतला होता.
Comment List