Kurla bus accident – वाहतूक विभागाच्या मुख्य व्यवस्थापकांच्या नेतृत्वातील समिती करणार अपघाताची चौकशी

मुंबईतील कुर्ला येथे सोमवारी रात्री काळजाचा थरकाप उडवाणारा एसी बेस्ट बसचा अपघात झाला. या अपघातात 49 नागरिक गंभीर स्वरुपात जखमी झाले असून 7 जणांचा मृत्यू झाला आहे. या अपघाताची चौकशी व तातडीने नुकसान भरपाई देण्यासंदर्भात वाहतूक विभागाच्या मुख्य व्यवस्थापकांच्या नेतृत्वात समितीची स्थापना करण्यात आली आहे. तसेच मृतांच्या नातेवाईकांना दोन लाख रुपये आर्थिक मदत व जखमींवर औषधोपचाराचा खर्च बृहन्मुंबई महानगरपालिका व बेस्ट उपक्रमाच्या माध्यमातून केला जाणार असल्याची घोषणा करण्यात आली आहे.

कुर्ला येथे बेस्ट बस मार्ग क्रमांक ए-332 सोमवारी, 9 डिसेंबर 2024 रोजी रात्री 9.30 च्या दरम्यान भीषण अपघात झाला होता. या अपघातात 49 नागरिक गंभीर जखमी झाले असून त्यांच्यावर मुंबईतील विविध रुग्णालयांमध्ये उपचार सुरू आहेत. तसेच यापैकी 7 जणांचा दुर्दैवी मृत्यू झाला आहे. या अपघाताची सविस्तर चौकशी करण्यासाठी वाहतूक विभागाच्या मुख्य व्यवस्थापकांच्या अध्यक्षतेखाली चौकशी समिती गठीत करण्यात आली आहे. त्याच बरोबर या अपघातातील मृतांच्या नातेवाईकांना तातडीची मदत म्हणून दोन लाख रुपये जाहीर करण्यात आले आहेत. तसेच जे नागरिक या अपघातात जखमी झाले आहेत. त्यांच्या औषधोपचाराचा खर्च बृहन्मुंबई महानगरपालिका व बेस्ट उपक्रम यांच्या मार्फत केला जाणार आहे. त्याच बरोबर मुख्यमंत्री देवेंद्र फडणवीस यांनी मृतांच्या नातेवाईकांना मुख्यमंत्री सहायता निधीतून 5 लाख रुपये आर्थिक मदत देण्यात येणार असल्याचे जाहिर केले आहे.