हिमाचल प्रदेशातील कुल्लू येथील आनी परिसरात भीषण दुर्घटना घडली आहे. अनी येथील शकेलहारजवळ येथे एक खासगी बस खोल दरीत कोसळल्याची घटना घडली आहे. यामध्ये चालकाचा मृत्यू झाला असून बसचा चक्काचूरा झाला आहे . 25 प्रवाशांनी भरलेली बस 200 फुट खोल दरीत कोसळल्याने अनेकांचा मृत्यू झाल्याची शक्यता वर्तवण्यात येत आहे. पोलीस या घटनेचा तपास करत असून या अपघातात नेमका किती जणांचा मृत्यू झाला याची आकडेवारी समजू शकलेली नाही.
मिळालेल्या माहितीनुसार, कुल्लू येथील आनी उपमंडलच्या श्वाड नगान रोडजवळ या बसचा अपघात झाला. मिळालेल्या प्राथमिक माहितीनुसार, बसमधील 20 ते 25 प्रवासी करसोग येथून आनी येथे परतत होते. मात्र मध्येच अपघात झाला. या अपघातात बसचा चक्काचुरा झाला. अनेक जखमी प्रवासी बसच्या आजुबाजूला दिसत आहेत. स्थानिकांचे बचावकार्य सुरु आहे. या घटनेनंतर बसचे पूर्णपणे नुकसान झाले आहे. ही बस रोडपासून थेट 200 फूट खोल दरीत कोसळली. स्थानिकांनी आपल्या खाजगी वाहनातून जखमींना रुग्णालयात नेले. भरधाव बसचालकाचा गाडीवरील ताबा सुटल्याने बस सरळ खाली जाऊन चक्काचूर झाल्याचा अंदाज व्यक्त केला जात आहे.
या अपघातानंतरचा एक व्हिडिओही समोर आला आहे. बस दरीत पडल्यानंतर शर्थीच्या प्रयत्नांनी स्थानिकांनी बसमधून प्रवास करणाऱ्या लोकांना बाहेर काढले. काही जखमींनी स्वतः बाहेर पडण्याचा प्रयत्नही केला. प्रत्यक्षदर्शींच्या म्हणण्यानुसार, अचानक त्यांना मोठा आवाज ऐकू आला. बस खड्ड्यात पडल्याचे दिसले. आतून किंचाळण्याचे आवाज ऐकू आले.त्यानंतर स्थानिक आवाजाच्या दिशेने तातडीने मदतीसाठी धावले. अपघाताची माहिती पोलिसांनाही कळवण्यात आली. सध्या जखमींना रुग्णालयात नेण्याचे काम सुरू आहे. या अपघातात चालकाचा मृत्यू झाला आहे. अपघाताचे नेमके कारण कळलेले नाही. या दुर्घटनेत किती जणांचा मृत्यू झाला, याची नेमकी माहिती सध्या उपलब्ध नाही.
Comment List