दक्षिण कोरियाचे राष्ट्राध्यक्ष यून सुक-येओल यांच्यावर सोमवारी प्रवासी बंदी घालण्यात आली. मार्शल लॉ लागू केल्यामुळे त्यांच्यावर ही बंदी घालण्यात आली आहे, असे दक्षिण कोरियाच्या एका अधिकाऱ्याने सांगितले. रॉयटर्सच्या वृत्तानुसार, गेल्या आठवड्यापासून मार्शल लॉ लागू झाल्यामुळे दक्षिण कोरियाचे पोलीस त्याच्याविरुद्ध बंडखोरीच्या आरोपांची चौकशी करण्यासाठी प्रवास बंदीचा विचार करत होते. त्यानंतर आज त्यांच्यावर ही बंदी घालण्यात आली आहे.
गेल्या मंगळवारी युन सुक-येओल यांनी विरोधी पक्षाने उत्तर कोरियाशी संगनमत केल्याचा आणि देशविरोधी कारवायांमध्ये सामील असल्याचा आरोप करत देशात मार्शल लॉ लागू केला होता. यानंतर त्यांना देशभरातून मोठ्या विरोधाचा सामना करावा लागला होता. विरोधी पक्षांनी त्यांच्याविरोधात महाभियोग प्रस्ताव आणला होता, मात्र मंजूर होऊ शकला नाही.
सत्ताधारी पक्षाच्या बहुतांश खासदारांनी महाभियोग प्रस्तावावर मतदानावर बहिष्कार टाकला होता, त्यामुळे विरोधकांना तो मंजूर करण्यासाठी आवश्यक 200 मते मिळवता आली नाहीत. मात्र बुधवारपासून दक्षिण कोरियात संसदेचे नवीन अधिवेशन सुरू होत आहे. अशातच विरोधक पुन्हा एकदा महाभियोग प्रस्ताव आणण्याच्या विचारात आहेत. दरम्यान, देशभरातून विरोध झाल्यानंतर मार्शल लॉ मागे घेण्यात आला आहे.
Comment List