संतोष देशमुख यांच्या खूनाच्या कारस्थानात ज्यांचा हात आहे त्या व्यक्तीचा मंत्रीमंडळात समावेश आहे. या खऱ्या आरोपींना पकडायची हिंमत आहे का देवेंद्र फडणवीसांमध्ये? अशा शब्दात शिवसेना (उद्धव बाळासाहेब ठाकरे) पक्षाचे नेते, संजय राऊत यांनी मुख्यमंत्री देवेंद्र फडणवीसांवर टीका केली आहे.
”महाराष्ट्रातील कायदे सुव्यवस्थेची अवस्था दिवसेंदिवस गंभीर होत चालली आहे. मुख्यमंत्री देवेंद्र फडणवीस विधानसभेत खोटं बोलत आहेत. संतोष देशमुखची हत्या महाराष्ट्राच्या डोळ्यासमोर झाली आहे. व्हिडीओ आहेत त्याचे तरीही तुम्ही ते लपवायचा प्रयत्न करताय. महराष्ट्राची परिस्थिती बिहारपेक्षा गंभीर आहे हे फडणवीसांनी समजून घ्यावं. परभणी बीडमध्ये ज्या घटना घडल्या आहेत त्या राज्याच्या प्रतिष्ठेला कलंक, काळीमा फासणाऱ्या आहेत आणि त्या भयंकर अपराधाशी संबंधित संशयित आरोपी आपल्या मंत्रीमंडळात बसलेले आहेत. आपण त्यांना घेतलेले आहे, असे संजय राऊत म्हणाले.
संतोष देशमुख व सोमनाथ सूर्यवंशींच्या हत्येची जबाबदारी या राज्याच्या गृहमंत्री व मुख्यमंत्र्यांनी घ्यायला हवी होती. सरकारची जबाबदारी होती त्यांचे प्राण वाचवायची. ज्यांनी या हत्या घडवल्या त्यांना पाठिशी घालताय. याच्यावर बोला. खरंतर मानवी हक्क आयोगाच्या अध्यक्षपदी जस्टिस सुब्रमण्यम यांची कालच नेमणूक झाली. पण सगळे गुलाम आहेत मोदींचे. कुठे आहे माणूसकी. हा महाराष्ट्र मानवता व माणूसकीसाठी ओळखला जात होता. गेल्या पाच वर्षात या महाराष्ट्रात रोज माणूसकीचा खून होतोय. देवेंद्र फडणवीस विधानसभेत खोटं बोलतायत. आम्हाला लाज वाटते याची, अशा शब्दात संजय राऊत यांनी फडणवीसांनवर निशाणा साधळा.
”फडणवीस न्यायाच्या गोष्टी करता. स्वत: एकदा बीडला जा. राहुल गांधी परभणीला गेले याने आपलं पित्त का खवळावं. राहुल गांधी विरोधीपक्षनेते आहेत. संविधानाने त्यांना जो दर्जा दिला आहे तो कॅबिनेट मंत्र्याचा आहे. तो दर्जा त्यांना भाजपने दिलेला नाही. जेव्हा आपल्या हातात होतं तेव्हा आपण त्यांना विरोधी पक्षनेते पद मिळू दिले नाही. आपण गृहमंत्री मुख्यमंत्री म्हणून जायला हवे होते. आपल्याला भिती वाटते जायची. गेलात तरी सैन्य घेऊन जाल. राहुल गांधींवर टीका करता द्वेष पसरवता म्हणून पण जर त्या कुटुंबाचा, त्या माऊलीचा, मुलांचा आक्रोश आपल्या कानाचा पडदा फाडत नसेल तर आपण निदर्यी आहात, अशी टीका संजय राऊत यांनी केली.
Comment List