चेंबूर विधानसभा मतदारसंघात आचारसंहितेची ऐशी की तैशी सुरू आहे. सत्ताधारी पक्षांकडून चेंबूरच्या घाटला परिसरात घरोघर जाऊन साडी वाटप केले जात आहे. हा आचारसंहितेचा भंग असून त्यासंदर्भात संबंधितांवर कडक कारवाई करावी, अशी मागणी शिवसेनेने निवडणूक आयोगाकडे केली आहे.
शिवसेनेने या प्रकाराबाबत निवडणूक आयोगाकडे लेखी तक्रार केली आहे. गेले तीन-चार दिवस काही लोक चेंबूरच्या घाटला परिसरात घरोघर जाऊन साडी वाटप करत असल्याच्या तक्रारी शिवसैनिकांकडे आल्या होत्या. रविवारी शिवसैनिकांनी त्या परिसरात जाऊन साडी वाटप करणाऱया दोन जणांना रंगेहाथ पकडले. त्यांचा साडी वाटप करतानाचा व्हिडीओही काढण्यात आला.
सदरहू दोन जणांना या साडी वाटपाबाबत शिवसैनिकांनी विचारले असता लाडक्या बहिणीला पैसे देतोय तशाच साडय़ाही देतोय असे उत्तर त्यांनी दिले. यासंदर्भात निवडणूक आयोगाकडे रीतसर तक्रार करण्यात आली आहे, अशी माहिती शिवसेना सचिव सुप्रदा फातर्पेकर यांनी दिली.
Comment List