आबांची मुलगी अजित पवारांवर संतापली

70 हजार कोटींच्या सिंचन घोटाळय़ामधील चौकशीच्या फाईलवर राज्याचे माजी गृहमंत्री आर. आर. पाटील यांनी सही केली होती. पाटील यांनी मला अंधारात ठेवून माझा केसाने गळा कापला, असा गंभीर आरोप अजित पवार यांनी ऐन निवडणुकीत केल्याने आर. आर. पाटील यांची मुलगी स्मिता पाटील यांनी संताप व्यक्त केला आहे.

साडेनऊ वर्षांनंतर दादांनी आपल्या मनातील खदखद व्यक्त केली. खरे तर याविषयी मला दुःख आणि वाईट वाटत आहे. कारण आता बोलण्याची ही वेळ नव्हती. निवडणुकीच्या तोंडावर त्यांनी खदखद बोलून दाखवली, असे स्मिता म्हणाल्या. दादांचे हे वक्तव्य करण्यामागे काय हेतू होता, काय दृष्टिकोन होता, हे मला खरेच माहीत नाही. आबांच्या पश्चात दादांनी आमचे पालकत्त्व स्वीकारले होते. माझ्या लग्नाच्या वेळी दादांनी पुढाकार घेतला होता, परंतु आता ते आबांविषयी असे का बोलले असावे हे मला माहिती नाही असे स्मिता म्हणाल्या. आबांबद्दल दुसरे कोणीही बोलले असते तर त्याचे इतके वाईट वाटले नसते. दादांना आम्ही वडिलांच्या जागी पाहतो. त्यांचा आदर करतो. अशा दादांनी आमच्या होमपीचवर असे वक्तव्य केल्याने मला खेद वाटत आहे, असे स्मिता यांनी म्हटले आहे.

आता विषय संपला!

आर.आर. पाटलांचा विषय माझ्यासाठी संपला आहे. माझ्या सदसद्विवेकबुद्धीला जे पटले ते बोललो, असे अजित पवारांनी स्पष्ट केले आहे.

Tags: Politics पुणे Pune राजकीय

About The Author

Manisha Thorat- Pisal

सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.