10 फेब्रुवारी रोजी झालेल्या गोळीबार प्रकरणात ATS च्या पथकाने आज आणखी दोघांना अटक केली. आज दुपारी या दोघांना न्यायालयात हजर करण्यात आल्यानंतर त्यांना न्यायालयाने 24 फेब्रुवारीपर्यंत पोलीस कोठडीत पाठविले आहे.
गोळीबार करणार्‍या आरोपीला मदत करणार्‍यांची संख्या आता पाच झाली असून, त्यात चार जण नांदेडचे आहेत. तर एक पंजाब येथून आणला आहे.
10 फेब्रुवारी रोजी शहिदपूरा भागात सकाळी नऊ ते साडेनऊ वाजेच्या दरम्यान गोळीबार झाला होता. या गोळीबारात गुरमितसिंग सेवादार हा जखमी झाला. तर रविंद्रसिंग राठोड याचा मृत्यू झाला. नांदेड पोलिसांना हवा असलेल्या बब्बर खालसा संघटनेचा हरविंदरसिंघ उर्फ रिंधा याचा भाऊ सत्येंद्रसिंग उर्फ सत्या याचा खून केल्याप्रकरणी गुरमितसिंघ सेवादार याला जन्मठेपेची शिक्षा झाली. तो पॅरोल रजेवर आल्यानंतर सराईत आरोपींनी त्यांच्यावर गोळ्या झाडल्या. त्यात त्याचा मित्र रविंद्रसिंग राठोड हा मृत पावला. तर सेवादार हा रुग्णालयात उपचार घेत आहे. वजिराबाद पोलिसांनी हल्लेखोराला मदत करणार्‍या मनप्रितसिंग उर्फ मन्नू गुरुबक्षसिंग ढिल्लो आणि हरप्रितसिंग उर्फ हॅप्पी बाबूसिंग कारपेंटर या दोघांना अटक केली. त्यानंतर हा तपास दहशतवाद विरोधी पथकाकडे वर्ग झाला. पंजाबला गेलेल्या पोलीस पथकाने कालच अर्शदीपसिंग भजनसिंग याला अटक केली. त्याला न्यायालयाने काल 1 मार्च पर्यंत पोलीस कोठडी सुनावली. गोळीबार करणार्‍या आरोपीला मदत करणार्‍या नांदेड येथील दलजितसिंग करमसिंग संधू आणि हरजितसिंघ उर्फ राजू अमरजितसिंग गील या दोघांना एटीएसच्या पथकाने नांदेड येथून अटक केली. एटीएस पथकाचे पोलीस उपअधीक्षक रामेश्वर रेंगे, पोलीस निरीक्षक जगदीश भंडरवार, माणिक बेदरे यांनी ही कामगिरी बजावली.
आज दुपारी दलजितसिंग संधू व हरजितसिंग या दोघांना न्यायालयासमोर हजर करण्यात आले. या दोघांनीही गोळीबार करणार्‍या आरोपीस मदत केली, असा युक्तीवाद सरकारी पक्षाने केला. त्यानंतर या दोन्ही आरोपींना 24 फेब्रुवारीपर्यंत पोलीस कोठडीत पाठविले आहे.
Comment List