मंत्रालयात प्रवेश मिळवण्यासाठी सर्वसामान्यांना लांबच लांब रांगा, आधारकार्ड, फोटो अशी अडथळ्यांची शर्यत पार करावी लागते, मग कुठे मंत्रालयाच्या इमारतीत प्रवेश मिळतो. पण मंत्रालयात थेट प्रवेश मिळालेली काळा रंग, काळय़ा काचांची व्हीव्हीआयपी क्रमांकाची आलिशान लेंबॉर्गिनी कार आज दिवसभर चर्चेचा विषय ठरली होती. मुख्य म्हणजे, एक नंबर ‘ईडी’ या सीरिजच्या रजिस्ट्रेशन क्रमांकामुळे तर चर्चेला अधिकच उधाण आले होते.
राज्यात स्थानिक पातळीवर कामे होत नसल्यामुळे ग्रामीण भागातून दररोज असंख्य लोक मोठय़ा आशेने मंत्रालयात येतात. खासकरून मंत्रिमंडळ बैठकीच्या दिवशी तर झुंबड उडालेली असते. प्रवेश करण्याचा पास काढण्यासाठी लोकांना तासन्तास रांगेत उभे राहावे लागते. त्यानंतर मोठय़ा मुश्किलीने प्रवेश मिळतो. पण मंत्री आणि त्यांच्यासोबत आलेल्या कार्यकर्त्यांना आणि मुख्य म्हणजे उद्योगपती आणि बिल्डरांना अगदी सहजपणे मंत्रालयात प्रवेश मिळतो. मंगळवारी मंत्रिमंडळाची बैठक झाली. या दिवशी शिंदे गटाचे एक मंत्री तर कार्यकर्त्यांचा लवाजमा घेऊन मंत्रालयात आले होते, पण या सर्वांना रोखायची हिंमत पोलिसांमध्ये नव्हती.
…उपमुख्यमंत्र्यांच्या कार्यालयातून फोन
आकाशवाणी समोरच्या गार्डन गेटवर काळय़ा रंगाची इटालियन बनावटीची आलिशान लेंबॉर्गिनी गाडी आली. गाडी मंत्रालयात प्रवेश करण्यापूर्वीच सहाव्या मजल्यावरील उपमुख्यमंत्री कार्यालयातून गार्डन गेटवरील कंट्रोलला फोन आला. गाडी गेटवर येताच दोन पोलीस अधिकारी धावत पुढे गेले. लेंबॉर्गिनीच्या काळय़ा रंगाच्या काचा खाली आल्या. आतून शुद्ध मराठी भाषेत बोलणाऱया व्यक्तीने पोलिसांशी संवाद साधला. उपमुख्यमंत्री कार्यालयातून फोन आल्यामुळे गाडीची कोणतीही तपासणी झाली नाही आणि गाडीला आत प्रवेश मिळाला. वास्तविक, मंत्रालयात कोणत्याही गाडीला प्रवेश करण्यासाठी विशिष्ट पास दिला जातो; पण मुख्यमंत्री किंवा उपमुख्यमंत्री कार्यालयातून फोन आला तर पासची गरज लागत नाही. त्यामुळे फेरारीला सहज प्रवेश मिळाला. मंत्रालयात पार्क केलेली ही गाडी आणि गाडीचा ‘MH 1 ED 1′ हा व्हीव्हीआयपी क्रमांक चर्चेचा विषय ठरला.
Comment List