महाविकास आघाडी मैत्रीपूर्ण लढतीत पडणार नाही, प्रत्यक मतदारंसघात एकासएक लढत होईल, असा विश्वास शिवसेना (उद्धव बाळासाहेब ठाकरे) नेते, खासदार संजय राऊत यांनी व्यक्त केला. याबाबत आज आणि उद्या दुपारपर्यंत चर्चा करत मार्ग काढण्यात येईल, असेही त्यांनी स्पष्ट केले. महाविकास आघाडीतील तिन्ही पक्षांचे नेते एकमेकांच्या संपर्कात असून संवाद साधण्यात येत आहे. उद्या दुपारपर्यंत सर्व प्रश्न मार्गी लागतील, असा विश्वासही त्यांनी व्यक्त केला.
निवडणूक काळात करण्यात येणारी विधाने आणि सर्वच आरोप गांभीर्याने घेण्याची गरज नसते. काही जागा मित्रपक्षांच्या विद्यामान आमदारांच्या जागा आहेत. त्या जागांवर वारंवार चर्चा होऊनही तडजोड होऊ शकली नाही. तसेच अनेक शिवसेना आमदारांच्या विद्यमान जागा आम्ही सोडू शकत नाही. काँग्रेस, राष्ट्रवादी काँग्रेस शरदचंद्र पवार पक्ष, समाजवादी पक्ष कोणीही त्यांच्या विद्यमान जागा सोडायला तयार नसते. ही बाब सर्वच पक्षाच्या कार्यकर्त्यांनी समजून घेण्याची गरज आहे.
माजी आमदार रुपेश म्हात्रे सांगत आहेत ती भिवंडीची जागा मिळावी म्हणून आम्ही प्रयत्नांची पराकाष्ठा केली. मात्र, समजावादी पक्षाचे विद्यमान आमदार तेथे आहेत. आम्ही शेवटच्या क्षणापर्यंत त्या जागेसाठी प्रयत्न केले. मात्र, समाजवादी पक्षाने जागा सोडली नाही. अशावेळी आमच्यासमोर दुसरा कोणताही पर्याय राहात नाही. आम्ही मैत्रीपूर्ण लढतीत पडणार नाही, प्रत्येक जागेवर एकासएक लढत होईल असेही संजय राऊत यांनी स्पष्ट केले..
राज्यात सात ते आठ ठिकाणी महाविकास आघाडीतील दोन पक्षांचे उमेदवार आहेत. त्यांच्या पक्षाने त्यांना एबी फॉर्म देण्यात आले आहे. असे प्रकार घडलेल्या ठिकाणी आज आणि उद्या दुपारपर्यंत चर्चा करून मार्ग काढला जाईल, असे त्यांनी सांगितले. असे प्रकार काहीठिकाणी गैरसमजातून घडलेले आहेत. तर काही ठिकाणी असे प्रकार का घडले, याचा शोध घेण्यात येत आहे. जुन्नर, चंद्रपूर, मुंबईतील एक दोन ठिकाणी अशा काही भागात शिवसेनेच्या प्रमुख लोकांनी अर्ज दाखल केले आहेत. तसेच काँग्रेस आणि राष्ट्रवादी काँग्रेस शरदचंद्र पवार पक्षाकडून काही ठिकाणी असे झाले आहे. याबाबत आम्ही तिन्ही पक्षाचे नेते एकमेकांच्या संपर्कात असून संवाद करत आहोत. हे अपक्ष आणि काही ठिकाणी भरले गेलेले दोन अर्ज मागे घेतले जातील आणि एकास एक लढत होईल, असा विश्वासही संजय राऊत यांनी व्यक्त केला.
राज्यात 288 जागा आहेत. त्यामुळे काही चुका होऊ शकतात. त्या दुरुस्त केल्या आहेत. आधी दिग्रजची जागा आम्ही लढवणार होतो. काँग्रेसचे दिग्गज नेते माणिकराव ठाकरे यांच्यासाठी आम्ही ती जागा सोडली. दिग्रजऐवजी आम्ही दर्यापूरची जागा लढवत आहेत. असे काही बदल अनेक ठिकाणी करण्यात आलेले आहेत. शेकापशी अलिबाग, पेण, पनवेलबाबत आमची चर्चा झाली. सांगोल्याबाबती चर्चा होणार आहे. सांगोला ही आमची विद्यमान जागा आहे. आज आणि उद्यामध्ये हे सर्व विषय मार्गी लावण्यात येणार आहे, असेही त्यांनी स्पष्ट केले.
Comment List