दिल्ली आंतरराष्ट्रीय विमानतळावर खळबळ, दुबईहून आलेल्या एअर इंडियाच्या विमानात काडतूस सापडले

विमानात बॉम्ब ठेवल्याच्या धमक्या मिळत असतानाच एअर इंडियाच्या विमानात काडतूस सापडल्याने एकच खळबळ उडाली आहे. दुबईहून दिल्ली आंतरराष्ट्रीय विमानतळावर आलेल्या एअर इंडियाच्या विमानात काडतूस आढळल्याचे शनिवारी उघडकीस आले. याप्रकरणी एअर इंडियाने विमानतळ पोलिसांकडे तक्रार दाखल केली असून पोलीस प्रकरणाचा तपास करत आहेत.

एअर इंडियाच्या प्रवक्त्याने दिलेल्या माहितीनुसार, 27 ऑक्टोबर रोजी AI 916 हे विमान दुबईहून दिल्लीला आले. यावेळी सीटच्या पाकिटात एक काडतूस सापडले. सुदैवाने यात कोणतीही प्रवाशाची हानी झाली नाही. सर्व प्रवाशांना विमानातून सुखरूप बाहेर काढण्यात आले.

हे काडतूस विमानात कसे आले? कुणी ठेवले? याबाबत पोलीस सखोल तपास करत आहेत. गेल्या महिन्यात 13 दिवसांत इंडियन एअरलाइन्सच्या 300 हून अधिक विमानांना बॉम्बची धमकी मिळाली होती. सोशल मीडियाच्या माध्यमातून बहुतांश धमक्या देण्यात आल्या होत्या.

Tags:

About The Author

Manisha Thorat- Pisal

सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.