मुदतीपूर्वी जन्माला आलेली मुले अनेकदा कमी वजनाची असतात. त्यामुळे त्यांच्यात श्वसन, तापमान नियंत्रण आणि रक्त गोठण्यास संबंधित अनेक समस्या निर्माण होतात. मात्र आता रायगड जिल्ह्यातील कमी वजनाच्या नवजात बाळांना जीवदान मिळणार आहे. अलिबागमधील जिल्हा सामान्य रुग्णालयात 14 खाटांचा स्वतंत्र माता नवजात शिशु देखभाल कक्ष तयार करण्यात आला असून अशा बाळांची येथे खास निगा राखली जाणार आहे. यामध्ये योग्य आहार, औषधे तसेच इनक्युबेटरची व्यवस्था असणार आहे. तसेच तज्ज्ञ डॉक्टर, परिचारिकांचे चोवीस तास पथक तैनात असणार आहे.
कमी वजनाच्या बाळांमध्ये अनेक आरोग्य समस्या असू शकतात. काही मुलांमध्ये मेंदू आणि अवयवांचा पूर्ण विकास न झाल्यास त्यांना भविष्यात शिक्षणात आणि शारीरिक हालचालींमध्येही अडचणींना सामोरे जावे लागते. मात्र खासगी रुग्णालयातील उपचार पद्धती महागडी असल्याने गोरगरीबांना अनके अडचणींना सामोरे जावे लागते. यामध्ये बाळाच्या जीवालाही धोका पोहोचतो. हे लक्षात घेऊन राष्ट्रीय आरोग्य दिनाचे औचित्य साधून अलिबाग जिल्हा रुग्णालयाच्या वतीने एक अनोखे पाऊल टाकण्यात आले आहे. माता बालसंगोपन या उद्देशाने जिल्हा रुग्णालयात माता नवजात शिशु देखभाल कक्षाची स्थापना करण्यात आली. त्यामुळे कमी वजनाच्या व नाजूक बाळांना त्याच्या आईच्याच सहवासात ठेवून त्याची चांगल्या प्रकारे निगा राखणे आता सहज शक्य होणार आहे.
मातांना खास प्रशिक्षण दिले जाणार
कक्षात असणाऱ्या प्रत्येक मातेला व बालकाला लागणारी उपकरणे, कपडे व साधने यांनी हा कक्ष सुसज्ज केला आहे. या कक्षाची देखभाल व्यवस्थितरीत्या व्हावी याकरिता लागणाऱ्या परिचारिका, डॉक्टर यांचे पथक 24 तास या ठिकाणी असणार आहे. जिल्हा शल्यचिकित्सक डॉ. निशिकांत पाटील, अतिरिक्त जिल्हा शल्यचिकित्सक डॉ. शीतल जोशी-घुगे यांच्या हस्ते तसेच डॉ. सागर खेदू, परिचारिका, कर्मचारी यांच्या निदर्शनाखाली या नवीन कक्षाची स्थापना केली आहे. विशेष म्हणजे घरी गेल्यानंतर कमी वजनाच्या बाळांचे कसे संगोपन करता येईल यासाठी मातांना खास प्रशिक्षण दिले जाणार आहे.
इनक्युबेटर, वेळोवेळी तपासणी
कमी वजनाच्या बाळांवर उपचार करण्यासाठी 14 खाटा तसेच चार ते पाच इनक्युबेटर ठेवण्यात आले आहेत. बाळाला योग्य पोषण मिळावे यासाठी स्तनपान किंवा फॉर्म्युला आहार दिला जाणार आहे. गरज भासल्यास, सलाईनद्वारे किंवा नळीद्वारे आहार दिला जाणार आहे. गरज भासल्यास बाळाला आवश्यक औषधे दिली जातील. श्वसनक्रिया सुधारण्यासाठी किंवा संसर्ग टाळण्यासाठी विशेष काळजी घेतली जाणार असल्याचे वैद्यकीय अधिकाऱ्यांनी सांगितले.
Comment List