लोकप्रिय गायक दिलजीत दोसांझ सध्या देशातील विविध शहरांमध्ये कॉन्सर्ट करत आहे. त्याच्या ‘दिल- लुमिनाटी टूर’ला चाहत्यांचे भरभरून प्रेम मिळत आहे. अशातच त्याची इंदूरमधील कॉन्सर्ट वादाच्या भोवऱयात सापडली. दिलजीतचा निषेध करत त्याची कॉन्सर्ट रद्द करण्याची मागणी बजरंग दलाने केली. या निषेधादरम्यान दिलजीतने इंदूरचे लोकप्रिय उर्दू कवी राहत इंदौरी यांची प्रसिद्ध गझल ‘किसी के बाप का हिंदुस्थान थोडी है’चा उल्लेख करत अप्रत्यक्षपणे टीका करणाऱयांना प्रत्युत्तर दिले.
रविवारी दिलजीत दोसांझने राहत इंदौरी यांचे स्मरण करत कॉन्सर्ट त्यांना समर्पित केली. ‘अगर खिलाफ है होने दो, जान थोडी है…ये सब धुआँ है आसमान थोडी है, सभी का खून है शामिल यहाँ की मिट्टी में, किसी के बाप का हिंदुस्थान थोडी है’ ही राहत इंदौरींची लोकप्रिय गझल त्याने म्हटली. अलीकडे ही गझल नागरिकत्व दुरुस्ती कायदा आणि एनआरसीला विरोध करणाऱयांचे घोषवाक्य बनल्यानंतर जास्तच लोकप्रिय झाली होती.
रविवारी बजरंग दलाने दिलजीत दोसांझच्या संगीत मैफलीला परवानगी देऊ नये म्हणून इंदूर पोलिसांशी संपर्क साधला होता. बजरंग दलाचे नेते अविनाश कौशल म्हणाले, ‘‘दिलजीतने शेतकऱयांच्या आंदोलनादरम्यान अनेकदा देशविरोधी वक्तव्ये केली आहेत. तो खलिस्तानचा समर्थकही आहे. अशा व्यक्तीला आम्ही आई अहिल्याच्या नगरीत कार्यक्रम करू देणार नाही. हा शो रद्द करण्याची मागणी करणारा अर्ज आम्ही प्रशासनाला दिला आहे. त्यानंतरही कार्यक्रम आयोजित केल्यास आम्ही आमच्या पद्धतीने निषेध करू.’’
इंदूरमध्ये बजरंग दलाचे नेते तन्नू शर्मा म्हणाले, ‘‘आमचा निषेध अमली पदार्थांच्या सेवनाविरुद्ध होता. या मैफलीला आमचा विरोध नाही. या समारंभात अमली पदार्थांचे सेवन करणे आपल्या संस्कृतीत नाही. आम्ही याच्याविरोधात आहोत. आम्ही दारू पिण्याच्या विरोधातही आहोत आणि या मैफलीतही असे स्टॉल असतात.’’दिलजीतने त्याच्या कॉन्सर्टमध्ये बजरंग दलाचा उल्लेख केला नाही, पण कॉन्सर्टची तिकिटे ब्लॅकने विकली जात असल्याच्या आरोपावर तो बोलला. दिलजीत म्हणाला, हा माझा दोष नाही. कुणी 10 रुपयांचे तिकीट 100 रुपयांना विकले यात कलाकाराचा काय दोष?’’
Comment List