सोलापूर येथील सिद्धेश्वर मार्केट यार्डातील कांदा अडत व्यापारी किशोर दत्तात्रय मडूर याला चेक बाऊन्स व फसवणूकप्रकरणी न्यायदंडाधिकारी डी. जी. कंखरे यांनी चार महिने कारावासाची शिक्षा व सव्वा आठ लाख रुपयांचा दंड ठोठावला आहे.
सिद्धेश्वर मार्केटयार्डमधील कांदा व्यापारी किशोर दत्तात्रय मडूर यांनी 2020-21 या सालामध्ये मार्केट यार्डातील कांदा व्यापारी बिलाल अ. गफूर बागवान यांच्याकडून आठ लाख 9 हजार 94 रुपयांचा कांदा विकत घेतला होता. या व्यवहारप्रकरणी अडत व्यापारी मडूर याने रोख रक्कम न देता चेक दिला होता. परंतु, बँक खात्यात रक्कम नसल्याने दिलेला चेक बाऊन्स झाला.
चेक बाऊंस झाल्यामुळे सदरचे चेक बिलाल बागवान याने परत दिले. त्यानंतर रक्कम मागूनही न दिल्याने वकिलामार्फत नोटीस बजावण्यात आली. तरीही रक्कम न दिल्याने प्रथमवर्ग न्यायदंडाधिकारी यांच्या न्यायालयात खासगी फिर्याद दाखल करण्यात आली. यात सात साक्षीदार तपासण्यात आले. साक्षी व पुराव्यावरून न्यायदंडाधिकाऱयांनी अडत व्यापारी किशोर मडूर याला चार महिन्यांचा कारावास व 8 लाख 30 हजार रुपयांचा दंड ठोठावला. या खटल्यात ऍड. इस्माईल शेख, सिराज शेख, एम. ए. इनामदार यांनी काम पाहिले.
Comment List