सोसायटीमध्ये पार्सल देण्यासाठी आलेल्या डिलिव्हरी बॉयला पॅसेंजर लिफ्टचा वापर न करता सर्व्हिस लिफ्टचा वापर करण्यास सांगितल्याच्या कारणावरून डिलिव्हरी बॉयने त्याच्या 20-25 साथीदारांना घेऊन येत सोसायटीमध्ये राडा घातला. सुरक्षारक्षकासह चौघांवर दांडके, दगडाने मारहाण करत जीवे मारण्याचा प्रयत्न केला. ही घटना शनिवारी (दि. 7) सकाळी साडेअकराच्या सुमारास पुनावळेतील पूना व्हिले सोसायटीत घडली. याप्रकरणी रावेत पोलिसांनी सात जणांना गजाआड केले आहे.
सुरक्षारक्षक मोहम्मद अशरफ मोहम्मद शफी (वय 27, रा. पुनावळे, मूळ- जम्मू-कश्मीर), सुपरवायझर प्रभाकर पांडे, एरिया सुपरवायझर ज्ञानदेव भोगील, सुरक्षारक्षक मेहबूब शेख अशी जखमींची नावे आहेत. मोहम्मद शफी यांनी रावेत पोलीस ठाण्यात फिर्याद दिली आहे. मारुती परसराम वराडे (वय 20, रा. जांबे, ता. मुळशी), केदार जितेश बनसोडे (वय 19, रा. वाकड), गोपाल सिद्धेश्वर बोरावडे (वय 26, रा. पुनावळे), प्रियंकसिंग सुरेंद्रसिंग तोमर (वय 23, रा. हिंजवडी), रजाक इर्शाद खान (वय 25, रा. देहूरोड), सुनील विठ्ठल गवळी (वय 20, रा. जांबे, ता. मुळशी), सुनील सिद्धू बोधणे (वय 20, रा. मामुर्डी, ता. मावळ) अशी अटक आरोपींची नावे आहेत. राहुल गोपाळ बोरावडे आणि इतर 14 ते 15 जणांविरोधात गुन्हा दाखल करण्यात आला आहे.
आरोपी मारुती वराडे हा झेप्टो कंपनीचा डिलिव्हरी बॉय म्हणून काम करतो. तो शनिवारी सकाळी पूना व्हिले सोसायटी येथे पार्सल देण्यासाठी आला. त्यावेळी तिथे नेमणुकीस असलेले सुरक्षारक्षक फिर्यादी शफी यांनी त्यास पॅसेंजर लिफ्टचा वापर न करता सर्व्हिस लिफ्टचा वापर करण्यास सांगितले. या कारणावरून आरोपी वराडेने चिडून त्याच्या इतर साथीदारांना बोलावून घेतले. आज याला संपवूनच टाकतो, असे म्हणून दोघांनी फिर्यादीच्या डोक्यात लाकडी दांडक्याने मारहाण करून त्यांना गंभीर जखमी केले. इतर पाच ते सहा जणांनी फिर्यादी यांना लाथाबुक्क्यांनी मारहाण केली. हे भांडण सोडविण्यासाठी सुपरवायझर पांडे आले असता त्यांनादेखील आरोपींनी दगडाने, लाथाबुक्क्यांनी तसेच एरिया सुपरवायझर ज्ञानदेव भोगील व सुरक्षारक्षक मेहबूब शेख यांनादेखील 15 ते 20 जणांनी लाथाबुक्क्यांनी मारहाण केली. फौजदार राहुल खिळे याप्रकरणी अधिक तपास करीत आहेत.
Comment List