रविवारी रात्री भावूक होत मनोज जरांगे-पाटील यांनी काही मतदारसंघांत उमेदवार देण्याचा निर्णय जाहीर केला. मात्र सोमवारी सकाळी केवळ एका जातीच्या जोरावर निवडणूक लढणे आणि जिंकणे शक्य नाही, असे स्पष्ट करीत त्यांनी विधानसभेच्या मैदानातून माघार घेत असल्याचे जाहीर केले. निवडणुकीतून माघार घेत असलो तरी पाडापाडी मात्र करणार असल्याचेही त्यांनी स्पष्ट केले.
विधानसभा निवडणुकीत प्रत्यक्ष उतरायचे का? यावर आंतरवाली सराटीत आठ दिवसांपासून चर्चा सुरू होती. विविध जातीधर्माचे लोक भेटून गेल्यानंतर मनोज जरांगे यांनी स्वतः विधानसभेच्या रणांगणात पूर्ण ताकदीनिशी उतरण्याचे संकेत दिले होते. रविवारी रात्री पत्रकारांशी बोलताना त्यांनी 14 मतदारसंघांची नावे जाहीर केली. सोमवारी सकाळी उमेदवारांची नावे जाहीर करणार असल्याचेही ते म्हणाले. त्यामुळे मनोज जरांगे जाहीर करणार असलेल्या उमेदवारांबद्दल कुतूहल निर्माण झाले होते. परंतु पत्रकारांशी बोलताना जरांगे यांनी विधानसभेच्या निवडणुकीतून माघार घेत असल्याचे स्पष्ट केले. रात्री उशिरापर्यंत मराठा समाजाची बैठक झाली. या बैठकीत कोणत्याही एका जातीच्या जोरावर निवडणूक लढणे आणि जिंकणे सोपे नाही, उमेदवार दिला आणि तो पडला तर समाजाचा अपमान होईल. त्याबरोबरच मित्रपक्षांकडून येणाऱया यादीची आम्ही वाट पाहत होतो. परंतु त्यांची यादी आली नाही, म्हणून विधानसभा न लढवण्याचा निर्णय घेण्यात आल्याचे मनोज जरांगे यांनी सांगितले. निवडणुकीतून माघार घेत असलो तरी पाडापाडी मात्र करणारच, असे सांगतानाच कोणत्याही अपक्षाला पिंवा राजकीय पक्षाला पाठिंबा दिला नसल्याचेही त्यांनी स्पष्ट केले. मराठा आरक्षणासाठी आंदोलन सुरू राहणारच असल्याचेही ते म्हणाले.
आपल्यावर कुणाचाही दबाव नाही
निवडणुकीतून माघार घेण्यासाठी आपल्यावर दबाव होता का, असे विचारले असता मनोज जरांगे यांनी त्यास स्पष्टपणे नकार दिला. आपल्यावर कोणाचाही दबाव असण्याचे कारण नाही, निवडणुकीतून माघार घेण्याचा निर्णय मराठा समाजाच्या बैठकीत घेतला असल्याचे ते म्हणाले.
केवळ एका जातीच्या जोरावर निवडणूक लढणे आणि जिंकणे शक्य नाही. आम्ही राजकारणात नवखे आहोत. उमेदवार उभा करून तो पडला तर जातीची इभ्रत जाईल. म्हणूनच विधानसभा निवडणुकीतून माघार घेण्याचा निर्णय घेत आहे.
Comment List