टिटवाळा स्थानकादरम्यान एक्सप्रेसच्या इंजिनमध्ये बिघाड, मध्य रेल्वेची वाहतूक पुन्हा कोलमडली

‘रोज मरे त्याला कोण रडे’ अशी काहीशी स्थिती मध्य रेल्वेची झाली आहे. कल्याण, डोंबिवली, टिटवाळा, अंबरनाथ, कर्जत, ठाणे या ठिकाणी राहणाऱ्या प्रवाशांना दररोज मध्य रेल्वेचा त्रास सहन करावा लागत आहे. गेल्या काही महिन्यांपासून मध्य रेल्वेचे विस्कळीत होण्याचे प्रमाण वाढले आहे. त्यातच आता एका एक्सप्रेसच्या इंजिनमध्ये बिघाड झाला आहे. त्यामुळे पुन्हा एकदा मध्य रेल्वेचा मोठा खोळंबा झाला आहे. यामुळे प्रवाशांना नाहक त्रास सहन करावा लागत आहे.

मिळालेल्या माहितीनुसार, मध्य रेल्वे मार्गावर कल्याणहून कसाराकडे जाणारी वाहतूक बंद झाली आहे. टिटवाळा स्थानकादरम्यान गीतांजली एक्सप्रेसमध्ये बिघाड झाला आहे. त्यामुळे कल्याणहून कसाराकडे जाणार वाहतूक ठप्प झाली आहे. यामुळे मध्य रेल्वेची वाहतूक विस्कळीत झाली आहे.

या बिघाडामुळे अनेक लोकल आणि एक्सप्रेस गाड्यांच्या लांबच लांब रांगा लागल्या आहेत. सध्या कल्याण स्थानकात अनेक गाड्या एका पाठोपाठ एक उभ्या राहिल्याचे दिसत आहेत. यामुळे अप आणि डाऊन अशा दोन्ही मार्गावरील लोकल वाहतूक उशिराने सुरु आहे. यामुळे प्रवाशांचे हाल होत असल्याचे दिसत आहे.

 मध्य रेल्वे कायमच उशिरा

दरम्यान मध्य रेल्वे ही उशिराने धावत असल्याची तक्रार सातत्याने प्रवाशांकडून केली जात आहे. मध्य रेल्वेच्या लोकलचे वेळापत्रक कायमच कोलमडले असल्याचे पाहायला मिळते. कर्जत, कसाराहून सीएसएमटीकडे जाणाऱ्या धिम्या व जलद मार्गावरील लोकल सेवा पूर्ण विस्कळीत झाली.लोकल सेवा विस्कळीत झाल्याने दिवा, कल्याण, डोंबिवली, ठाकुर्ली, टिटवाळा रेल्वे स्थानकांमध्ये प्रवाशांची गर्दी उसळली. अनेक लोकल या अनियमित वेळेत धावत होत्या.

सकाळी लाखो चाकरमानी हे मुंबई लोकलने प्रवास करत ऑफिस गाठतात. मात्र अचानक हा बिघाड झाल्याने प्रवाशांचा मोठा खोळंबा झाला. त्यामुळे अनेक प्रवाशांना ऑफिसला पोहोचायला, तसेच विद्यार्थ्यांना शाळा-कॉलेजमध्ये जाण्यास उशीर झाल्याचे पाहायला मिळाले. यामुळे अनेक कर्मचारी संतप्त झाले आहेत. तसेच रेल्वे उशिराने धावत असल्याने स्टेशनवरही मोठी गर्दी पाहायला मिळत आहे.