हरविंदरसिंग उर्फ रिंधा याच्या भावाचा खून केल्याप्रकरणी पॅरोलवर असलेल्या गुरमितसिंग सेवादार आणि त्याच्या मित्रावर गोळीबार केल्याप्रकरणी नांदेड पोलिसांनी आतापर्यंत नऊ जणांना अटक केली आहे. या गोळीबार प्रकरणाचा सूत्रधार असलेला दहशतवादी हरप्रितसिंग उर्फ हॅप्पी पॅसिया याला अमेरिकेच्या फेडरल ब्युरो ऑफ इन्हेस्टिगेशन या गुप्तचर संस्थेने ताब्यात घेतले आहे. हरप्रितसिंगला भारतात आणण्याचे प्रयत्न सुरु आहेत.
नांदेड शहरात 10 फेब्रुवारी रोजी रिंधा याच्या भावाचा खून करणार्‍या आरोपीवर गोळीबार करण्यात आला होता. मात्र हत्येचा आरोपी गुरमितसिंग राजासिंग सेवादार हा जखमी झाला. तर त्याचा मित्र रविंद्रसिंग दयालसिंग राठोड हा गोळीबारात ठार झाला. गुरमितसिंग सेवादार जन्मठेपेची शिक्षा भोगत असून तो पॅरोलवर सुटला होता. नांदेड पोलिसांनी जेल प्राधिकरणाला सेवादार याची सुटका करु नका, काही घातपात होवू शकतो असे लेखी पत्रही दिले होते. यानंतरही पॅरोलवर त्याची सुटका झाली आणि 10 फेब्रुवारी रोजी हि गोळीबाराची घटना घडली.
या प्रकरणात स्थानिकचे पाच व पंजाबमधून चार अशा नऊ जणांना अटक करण्यात आली. या प्रकरणाचा तपास एनआयए व दहशतवाद विरोधी पथक यांच्याकडे देण्यात आला होता. गुप्तचर यंत्रणा, एटीएस व एनआयएने या प्रकरणाचा गोपनीय पद्धतीने तपास सुरु केला. पंजाबमधील रहिवाशी असलेल्या संशयित दहशतवादी हरप्रितसिंग उर्फ हॅप्पी पॅसिया याने त्याच्या सहकार्‍यासोबत पंजाब राज्यात गेल्या काही महिन्यात धुमाकूळ घातला होता. हत्या करणे, हत्येचा प्रयत्न करणे, खंडणी मागणे, ग्रेनेड हल्ले करणे यासारखे गंभीर आरोप त्याच्यावर आहेत. पंजाब व हरियाणा पोलिसांना तो हवा आहे.
अनेकवेळा अथक परिश्रम करुनही तो पोलिसांना गुंगारा देण्यात यशस्वी झाला. राष्ट्रीय अन्वेषण यंत्रणेने त्याच्यावर पाच लाखाचे बक्षिसही जाहीर केले होते. पॅसिया कॅनडात असल्याची माहिती एनआयए व एटीएसच्या पथकाला मिळाली. त्या माहितीच्या आधारे दोन दिवसांपूर्वी त्याला अटक करण्यात आली. पंजाबमधील झालेल्या घटना तसेच नांदेडच्या गोळीबाराशी त्याचा सबंध असल्याने त्याला भारतात आणण्याची प्रक्रिया एनआयएने व एटीएसने सुरु केली आहे.
Comment List