Mahakumbh 2025 प्रयागराजमध्ये सुरू असलेल्या महाकुंभमध्ये मौनी अमावस्येनिमित्त अमृत स्नानासाठी प्रचंड गर्दी झाली आहे. या गर्दीच्या लोंढ्यांमुळे त्रिवेणी संगमाजवळ चेंगराचेंगरीची दुर्घटना घडली आहे. या दुर्घटनेत काही जणांचा मृत्यू झाला, तर अनेक भाविक जखमी झाले आहेत. अनेक प्रसारमाध्यमांतून संगम घाटावरील स्नानाचे महत्त्व अधोरेखीत करण्यात आल्याने या घाटवर अमृत स्नानासाठी मोठ्या प्रमाणात गर्दी झाली होती. इतर घाटावरही स्नानाची सोय असूनही भाविक संगम घाटावरच स्नानासाठी येत होते. त्यामुळे या ठिकाणी गर्दी झाल्याचे सांगण्यात येत आहे. तसेच घटनेपुर्वीच आयुक्तांनी चेंगराचेंगरीची भीती व्यक्त करत भाविकांना लवकरात लवकर स्नान करण्याचे आवाहन करत होते. याबाबतचा व्हिडीओ व्हायरल होत आहे.
व्हिडीओमध्ये संगम घाटावर उद्घोषणा करण्यात येत असल्याचे दिसत आहे. उद्घोषणा करत भाविकांना प्रयागराजचे आयुक्त विजय विश्वास पंत काही सूचना करत आहेत. महाकुंभ मेळ्याला आलेल्या भाविकांना लवकरात लवकर स्नान करण्याचे आवाहन ते करत आहेत. उद्घोषणाद्वारे आयुक्त सांगत आहेत की, सर्व भाविकांनी आमचे ऐकावं, येथे झोपून राहण्यात काही अर्थ नाही. जो झोपून राहतो, तो गमावतो. उठा उठा, स्नान करा. हे तुम्ही सुरक्षित राहण्यासाठी आहे. आज स्नानासाठी प्रंचड गर्दी होण्याची शक्यता आहे. गर्दी वाढल्यावर चेंगराचेंगरी होण्याची शक्यता आहे. तुम्ही आधी आला आहात, त्यामुळे तुम्हाला सर्वात आधी अमृत मिळायला हवे. सर्व भाविकांना हात जोडून विनंती आहे. उठा, झोपू नका. जर सर्वात आधी आला आहात. तुम्ही स्नान करून घ्या, असे आवाहन आयुक्त भाविकांना करत आहेत.
अनेक भाविक सूर्योदयाची वाट बघत स्नानासाठी थांबले होते. त्या भाविकांना आयुक्तांनी गर्दी टाळण्यासाठी लवकरात लवकर स्नान करण्याचे आवाहन करत आहेत. लोकांना स्नानासाठी जाण्याचे आवाहन करताना आयुक्तांनी चेंगराचेंगरी होण्याची शक्यता वर्तवली आहे, त्यावरून आता टीका होत आहे. चेंगराचेंगरी होण्याची अफवा आयुक्तच पसरवत असतील, तर दुर्घटना कशी होणार नाही? असा सवालही विचारण्यात येत आहे.
Comment List