बँक खातेदाराचे लॉकर परस्पर उघडून दोन कोटी 65 लाख रुपयांच्या सोन्याच्या दागिन्यांचा अपहार केल्याचा धक्कादायक प्रकार उघडकीस आला आहे. लॉकरमधील दागिन्यांसह साडेनऊ लाखांची रोकड, महत्त्वाची कागदपत्रे चोरून नेल्याची तक्रार खातेदाराने दिली आहे. पंजाब नॅशनल बँकेचे व्यवस्थापक नयना अजवानी, सुरेंदर शहानी, तसेच सराफी पेढीचे मालक सतीश पंजाबी यांच्यासह पाचजणांविरुद्ध गुन्हा दाखल केला आहे. यश केशवलाल कपूर (वय 46, रा. सोपानबाग, घोरपडी) यांनी लष्कर पोलीस ठाण्यात फिर्याद दिली आहे.
लष्कर भागातील ‘अरोरा टॉवर्स’ इमारतीत पंजाब नॅशनल बँकेची शाखा असून, कपूर यांनी दागदागिने बँकेच्या लॉकरमध्ये ठेवले होते. दोन महिन्यांपूर्वी लॉकर उघडून तपासणी केली असता, लॉकरमध्ये हिरेजडित दागिने, रोकड सुस्थितीत होती. 6 सप्टेंबरला ते पंजाब नॅशनल बँकेच्या शाखेत गेले. तेव्हा 13 ऑगस्ट रोजी बँक व्यवस्थापक अजवानी, शहानी यांनी परवानगी न घेता कपूर यांचे लॉकर उघडल्याची माहिती मिळाली. शहानी यांनी इतरांच्या मदतीने तीन ते चार वेळा प्रयत्न करून लॉकर उघडले. त्यातील हिरेजडित सोन्याचे दागिने, रोकड, महत्त्वाची कागदपत्रे पूर्वसूचना न देता काढून घेण्यात आल्याचे कपूर यांना समजले.
बँकेने नियमांचे पालन न करता व्यवस्थापकाने लॉकर उघडले. लॉकरमधील दोन कोटी ६५ लाख रुपयांचे दागिने सराफ सतीश पंजाबीला दिले. त्यानंतर पंजाबीने दागिने परस्पर वितळविले. पुरावा नष्ट करण्यासाठी दागिने वितविळण्यात आल्याचे कपूर यांनी फिर्यादीत नमूद केले आहे. या घटनेची माहिती मिळताच परिमंडळ-२च्या पोलीस उपायुक्त स्मार्तना पाटील, सहायक आयुक्त दीपक निकम, लष्कर पोलीस ठाण्याचे वरिष्ठ पोलीस निरीक्षक गिरीश दिघावकर यांनी बँकेस भेट दिली. पोलिसांनी बँकेतील सीसीटीव्ही चित्रीकरण तपासले असून, एपीआय विशाल दांडगे तपास करीत आहेत.
Comment List