लोकसभा निवडणुकीत संविधानाच्या अस्तित्वाचा अत्यंत महत्त्वाचा मुद्दा केंद्रस्थानी होता. या मुद्दय़ानेच भाजपला 303 जागांवरून 240 जागांपर्यंत खाली खेचले. असे सांगतानाच अनुसूचित जाती, जमातींचे उपवर्गीकरण करण्यामागे नवी हिंदू दलित व्होट बँक गठित करण्याचे भाजपाचे राजकारण आहे, असा आरोप संविधान तज्ञ आणि बहुजन रिपब्लिकन सोशालिस्ट पार्टीचे अध्यक्ष अॅड. डॉ. सुरेश माने यांनी केला आहे.
डॉ. सुरेश माने हे शनिवारी मुंबईत उपवर्गीकरण या विषयावर दलित विचारवंत, कायदेतज्ञ, माजी सनदी अधिकारी, साहित्यिक, पत्रकार आणि समाजिक कार्यकर्त्यांच्या एका परिषदेत बोलत होते. अंधेरीतील चार बंगला येथील कर्मवीर दादासाहेब गायकवाड सांस्कृतिक केंद्रातर्फे अध्यक्ष विजय जाधव आणि सरचिटणीस चंद्रकांत बच्छाव यांनी डॉ. आंबेडकर जन्मशताब्दी भवनात ही परिषद आयोजित करण्यात आली होती. देशात अनुसूचित जातींची संख्या 1108 इतकी असून अनुसूचित जातींची संख्या 628 आहे. त्यातून उपवर्गीकरणाची मागणी करणाऱ्या एससी जातींची संख्या 10सुद्धा नाही. तर एसटीमधील कुठल्याही जातीने तशी मागणी केलेली नाही. असे असतानाही पेंद्र सरकारला त्या जाती-जमातींना अलग अलग करण्याची गरज का भासली आहे, असा सवालही डॉ. सुरेश माने यांनी केला. दरम्यान, परिषदेत माजी खासदार डॉ. भालचंद्र मुणगेकर, साहित्यिक अर्जुन डांगळे, माजी आयपीएस सुधाकर सुराडकर, माजी न्यायाधीश डॉ. डी.के. सोनावणे, अॅड. जयमंगल धनराज, प्रा.डॉ. एम.के. डेकाटे, प्रा.डॉ. जयराम चव्हाण, चर्मकार नेते अच्युत भोईटे, ज्येष्ठ पत्रकार मधु कांबळे, दिवाकर शेजवळ, चंद्रकांत सोनावणे, प्रशांत रुपवते, अॅड. किशोर कांबळे यांनी आपले विचार मांडले.
Comment List