सोलापूरमधील प्रसिद्ध न्यूरोसर्जन डॉ. शिरीष वळसंगकर यांनी 18 एप्रिल रोजी रात्री साडे आठच्या सुमारास स्वत:वर गोळी झाडून आत्महत्या केली होती. यामुळे वैद्यकीय क्षेत्रात मोठी खळबळ उडाली होती. आता या आत्महत्या प्रकरणाला वेगळे वळण लागले असून डॉ. वळसंगकर यांना आत्महत्येला प्रवृत्त केल्याप्रकरणी एका महिलेविरोधात गुन्हा दाखल करण्यात आला आहे.
डॉ. वळसंगकर यांच्या हॉस्पिटलमध्ये प्रशासकीय अधिकारी म्हणून काम करणाऱ्या मनीषा मुसळे-माने यांच्याविरोधात गुन्हा दाखल करण्यात आला आहे. डॉ. वळसंगकर यांचे सुपुत्र डॉ. अश्विन शिरीष वळसंगकर (वय. – 45, राहणार – एस.पी. इन्स्टिट्यूट ऑफ न्यूरोसायन्सेस, वळसंगकर हॉस्पिटल, मोदी रेल्वे क्रॉसिंग, सोलापूर) यांनी या प्रकरणी फिर्याद दिली आहे.
डॉ. वळसंगकर यांनी आत्महत्येपूर्वी लिहिलेल्या चिठ्ठीमध्ये मनीषा मुसळे-माने यांच्या नावाचा उल्लेख असून त्यांच्यामुळे आपण टोकाचे पाऊल उचलत असल्याचे त्यांनी नमूद केले आहे. या प्रकरणी न्यायालयाची परवानगी घेऊन रात्रीच आरोपी महिलेला अटक करण्यात आल्याची माहिती पोलिसांनी दिली.
काय आहे तक्रार?
डॉ. वळसंगकर यांनी आरोपी महिलेला वेळोवेळी सहकार्य करूनही त्यांनी त्यांच्यावर खोटे आरोप केले. एवढेच नाही तर धमकीही दिली. या आरोपांना कंटाळून डॉ. वळसंगकर यांनी स्वत:च्या बेडरुमला अटॅच असलेल्या बाथरुममध्ये परवाना असलेल्या पिस्तूलमधून डोक्यात गोळी झाडून आत्महत्या केली. आरोपी महिला वडिलांच्या मृत्यूस कारणीभूत असल्याची तक्रार डॉ. अश्विन शिरीळ वळसंगकर यांनी दिली. पोलिसांनी गुन्हा दाखल करत न्यायालयाच्या परवानगीने महिलेला अटक केली आहे. आरोपी महिलेची कसून चौकशी सुरू असून आणखी काही गोष्टी समोर येण्याची शक्यता आहे.
Comment List