Jalna crime news – अनैतिक संबंधाच्या संशयातून अंबडमध्ये तरुणाचा खून, एकाला अटक, तीन आरोपी फरार

जालना जिल्ह्यातील अंबड शहरामध्ये अनैतिक संबंधाच्या संशयातून एका तरुणाचा चाकूने वार करत खून करण्यात आला. कलिम शेख खाजा शेख (वय – 30) असे मृताचे नाव आहे. शनिवारी रात्री हा प्रकार घडला असून या प्रकरणी पोलिसांनी एका आरोपीच्या मुसक्या आवळल्या आहेत, तर तीन जण फरार झाले आहेत.

पोलिसांनी दिलेल्या माहितीनुसार, पठाण मोहल्ला भागात राहणाऱ्या महिलेसोबत कलिम शेखचे अनैतिक संबंध होते. या संबंधाची माहिती महिलेच्या पतीला मिळाली. यामुळे पतीसह त्याचे भाऊ आणि इतर नातेवाईक कलिमवर पाळत ठेऊन होते.

शनिवारी रात्री साडे दहाच्या सुमारास कलिमला एकटा गाठत सरफराज फेरोज शेख आणि अन्य तिघांनी त्याच्यावर चाकूने वार केला. यात जखमी झालेल्या कलिमला जालन्यातील जिल्हा रुग्णालयात दाखल करण्यात आले, मात्र उपचारांदरम्यान त्याची प्राणज्योत मालवली.

वय झालं, लग्न जमेना, मुलगा दारू पिऊन आला अन् पित्यानं लोखंडी मुसळीचा टोला डोक्यात घातला; जाग्यावरच मृत्यू

दरम्यान, या प्रकरणी अंबड पोलीस ठाण्यात सरफराज शेख यांच्यासह चौघांविरुद्ध गुन्हा दाखल करण्यात आला आहे. या गुन्ह्याचा तपास अंबड पोलीस ठाण्याचे प्रभारी अधिकारी आयपीएस सिध्दार्थ बारवाल हे करीत असून एका आरोपींला ताब्यात घेतल्याचे समजते. तीन जण फरार असून त्यांचा शोध सुरू आहे.