गेली आठ दशके प्रभादेवीत कबड्डीचा दम घुमवणाऱया स्वामी समर्थ क्रीडा मंडळाच्या राजाभाऊ देसाई स्मृतिचषक कबड्डी स्पर्धेच्या निमित्ताने अव्वल 12 व्यावसायिक संघांची संघर्ष पुन्हा एकदा पाहायला मिळणार आहे. येत्या 8 ते 11 फेब्रुवारीदरम्यान विशेष व्यावसायिक पुरुष गट कबड्डी स्पर्धेच्या निमित्ताने दिग्गज कबड्डीपटूंचा चढाई-पकडींचा थरार कबड्डीप्रेमींना अनुभवता येणार आहे.
कबड्डीला प्रो-कबड्डीची श्रीमंती लाभण्यापूर्वी कबड्डी आणि कबड्डीपटूंना मान आणि सन्मान मिळवून देताना दिमाखदार स्पर्धांचे आयोजन करणाऱया 81 वर्षांच्या तरुण तडफदार स्वामी समर्थ क्रीडा मंडळाने पुन्हा एकदा विशेष व्यावसायिक गट स्पर्धेचे आयोजन केले आहे. यंदाही मंडळाच्या विशेष व्यावसायिक स्पर्धेत इन्शुअरकोट स्पोर्ट्स (युवा पलटण), सेंट्रल बँक, मुंबई महानगरपालिका, रिझर्व्ह बँक, मिडलाईन ऍकॅडमी, एमपीएमसी पुणे, मुंबई पोर्ट प्राधिकरण अशा बलाढय़ संघांचा ‘दम’दार खेळ चवन्नी गल्लीत उभारलेल्या क्रीडानगरीतील एका मॅटच्या मैदानावर पाहण्याची संधी मिळणार आहे.
विजेत्याला लक्षाधीश करणार
कबड्डी संघ आणि कबड्डीपटूंना प्रोत्साहन मिळावे म्हणून या स्पर्धेत विजेत्या संघाला लाखमोलाचे म्हणजे 1,11,111 रुपयांचे रोख इनाम दिले जाणार असल्याची माहिती आमदार आणि मंडळाचे प्रमुख कार्यवाह आमदार महेश सावंत यांनी दिली. तसेच उपविजेत्या संघालाही 80 हजार रुपये आणि चषक दिला जाणार आहे. एवढेच नव्हे तर उपांत्य सामन्यात पराभूत झालेल्या संघांनाही रोख इनाम देऊन सन्मानित केले जाणार असल्याची माहिती आमदार सावंत यांनी दिली. स्पर्धेत एकंदर 12 बलाढय़ संघ खेळणार असून तीन-तीन संघांचे चार गट खेळविले जातील. प्रत्येक गटातील अव्वल दोन संघ उपांत्यपूर्व फेरीसाठी एकमेकांशी भिडतील. स्पर्धा अधिक रंजक आणि थरारक व्हावी म्हणून एकाच मॅटवर खेळविली जाणार असून प्रत्येक दिवशी पाच सामने खेळविले जाणार असल्याची माहिती मंडळाचे क्रीडा प्रमुख रवी शिंदे यांनी दिली.
शिवसेना शाखा क्र. 215 च्या वतीने हिंदुहृदयसम्राट शिवसेनाप्रमुख बाळासाहेब ठाकरे यांच्या जयंतीनिमित्त आयोजित हिंदुहृदयसम्राट चषक क्रिकेट स्पर्धेत क्रांतिनगर संघाने अजिंक्यपद पटकावले. या स्पर्धेचा पुरस्कार वितरण सोहळा उपनेते अरुण दुधवडकर, विभागप्रमुख संतोष शिंदे, उपविभागप्रमुख सुजीत राणे, समन्वयक विजय इस्वलकर, विधानसभा संघटक सुरेखा उबाळे , शाखा संघटक सुप्रिया रेडेकर, विनायक रामाणे, प्रेम लष्करी तसेच नववीर क्रीडा मंडळाचे पदाधिकारी आणि आयोजक शाखाप्रमुख विजय पवार, युवासेना विभाग अधिकारी हेमंत दुधवडकर यांच्या उपस्थितीत पार पडला.
Comment List