Mahakumbh 2025 – ब्रह्ममुहुर्तावर अमृतस्नान करण्यासाठी भाविक थांबलेले त्याचवेळी… उपमहानिरिक्षकांनी सांगितला घडलेला प्रकार

प्रयागराज येथे सुरू असलेल्या महाकुंभमेळ्यात बुधवारी पहाटे मौनी अमावस्येच्या निमित्ताने अमृतस्नानासाठी भाविकांची मोठी गर्दी उसळली होती. भाविकांचे जत्थेच्या जत्थे त्रिवेणी संगमावर स्नानासाठी येत असतानाच रात्री दोनच्या सुमारास तिथे चेंगराचेंगरी झाली. या चेंगराचेंगरीत 30 भाविकांचा मृत्यू झाला तर 60 जण जखमी झाले आहेत.

महाकुंभचे पोलीस उप महानिरिक्षक वैभव कृष्णा यांनी पत्रकार परिषद घेत घडलेला प्रकार सांगितला. ”मौनी अमावस्येच्या निमित्ताने भाविक ब्रह्ममुहुर्तावर अमृतस्नान करण्याची वाट पाहत होते. बरेचसे भाविक आधीच त्या ठिकाणी उपस्थित होते व ब्रह्ममुहुर्ताची वाट पाहत होते. त्यावेळी अचानक भाविकांची एक मोठी गर्दी तिथे पोहोचली. त्यामुळे मोठ्या प्रमाणात गोंधळ उडाला व चेंगराचेंगरी झाली. या चेंगराचेंगरीत 30 भाविकांचा मृत्यू झाला आहे.

मृतांच्या कुटुंबीयांना प्रत्येकी 25 लाख रुपयांची आर्थिक मदत जाहीर

या दुर्घटनेत मृत्युमुखी पडलेल्यांच्या कुटुंबियांना राज्य सरकारकडून प्रत्येकी 25 लाख रुपयांची आर्थिक मदत देण्यात येणार आहे. या दुर्घटनेची न्यायालयीन आयोगाकडून चौकशी करण्यात येणार आहे. तसेच ही समिती निर्धारित वेळेत राज्य सरकारला आपला अहवाल सादर करेल, असेही योगी आदित्यनाथ यांनी सांगितले.