चाईबासामध्ये चकमक; सुरक्षा दलाने 2 नक्षलवाद्यांचा केला खात्मा, 1 जवान जखमी

झारखंडच्या पश्चिमी सिंहभूल जिल्ह्यात चाईबासामध्ये सुरक्षा दल आणि नक्षलवाद्यांमध्ये चकमक झाली. या चकमकीत दोन नक्षलवाद्यांचा खात्मा करण्यात आला तर यात एक जवान जखमी झाला आहे. तर अनेक जण जखमी असल्याची शक्यता वर्तवली आहे. छत्तीसगड आणि झारखंडमध्ये सक्रिय असलेल्या नक्षलवाद्यांवर झारखंड पोलीस, 209 कोब्रा बटालियन आणि इतर सुरक्षा दलांकडून ही कारवाई केली जात आहे.

झारखंड आणि छत्तीसगडमध्ये नक्षलविरोधी कारवाया तीव्र करण्यात आल्या आहेत. सुरक्षा दलांना अलीकडच्या काळात नक्षलवाद्यांचा खात्मा करण्यात अनेक यश मिळाले आहे. याआधीही सुरक्षा दलांनी चाईबासा आणि आजूबाजूच्या जिल्ह्यांमध्ये नक्षलवाद्यांविरोधात अनेक यशस्वी कारवाया केल्या. पोलिसांनी दिलेल्या माहितीनुसार, घटनास्थळावरून दोन इन्सास रायफल जप्त करण्यात आल्या आहेत. खात्मा करण्यात आलेल्या नक्षलवाद्यांची ओळख अद्याप पटलेली नाही, मात्र या परिसरात नक्षलवादी असल्याच्या माहितीवरुन ही कारवाई करण्यात आल्याचे पोलिसांनी सांगितले. चकमकीनंतर सुरक्षा दलांनी परिसराला वेढा घातला असून संभाव्य लपलेल्या नक्षलवाद्यांचा शोध सुरू आहे. या चकमकीत अनेक नक्षलवादी जखमी झाल्याची शक्यता असून त्यांचा शोध सुरू असल्याचे पोलिस अधिकाऱ्यांनी सांगितले.