अवैधरीत्या जवळ पिस्तूल बाळगणाऱ्या एकाला शिवाजीनगर पोलिसांनी अटक केली. त्याच्याकडून एक गावठी कट्टा आणि काडतूस जप्त करण्यात आले आहे. अटक करण्यात आलेला आरोपी हा रेकॉर्डवरील गुन्हेगार आहे.
अंबाजी कल्याणी शिंगे (24, रा. ससाणे नगर, हडपसर) असे अटक करण्यात आलेल्याचे नाव आहे. शिंगे हा रेकॉर्डवरील गुन्हेगार असून त्याच्यावर यापूर्वी वानवडी, मुंढवा, हडपसर भागात गुन्हे दाखल आहेत. शिवाजीनगर पोलिसांचे पथक हद्दीत गस्तीवर होते. या दरम्यान नदीपात्र परिसरातील नाना – नानी पार्क भागात एकजण संशयितरित्या थांबला असून त्याच्याकडे पिस्तूल असल्याची माहिती अंमलदार सचिन जाधव यांना मिळाली. त्यानुसार वरिष्ठ निरीक्षक चंद्रशेखर सावंत यांच्या मार्गदर्शनाखाली सहायक निरीक्षक संजय पांढरे, कैलास दाबेराव, अंमलदार सचिन जाधव, दीपक चव्हाण, अतुल साठे यांच्यासह पथकाने सापळा रचून आरोपी शिंगेला ताब्यात घेतले. त्याची झडती घेतली असता एक पिस्तूल व काडतूस मिळून आले. शिवाजीनगर पोलिसांनी त्याला अटक करून पिस्तूल जप्त केले आले आहे. शिंगे याने हे पिस्तूल कोठून आणले, याबाबत शिवाजीनगर पोलीस तपास करत आहेत.
Comment List