‘नाना’ करते करोड का घपला कर बैठे..वरिष्ठ सहाय्यक लिपिक नाना कोरडे निलंबित

रायगड जिल्हा परिषदेतील ग्रामीण पाणीपुरवठा विभागात कर्मचाऱ्यांच्या खात्यात पगाराव्यतिरिक्त इतर फरकाची रक्कम दाखवून 1 कोटी 19 लाख रुपयांचा घोटाळा करणारा वरिष्ठ सहाय्यक लिपिक नाना कोरडे याला जिल्हा परिषदेचे मुख्य कार्यकारी अधिकारी डॉ. भरत बास्टेवाड यांनी तत्काळ निलंबित केले आहे. सुरुवातीला कोरडे याने मी घोटाळा केलाच नाही असे ‘ना-ना’ केले, पण त्याचा पर्दाफाश झाल्यानंतर कारवाईचा बडगा उगारण्यात आला असून त्याच्या घोटाळ्याची पाच सदस्यीय समिती चौकशी करणार आहे.

अलिबाग उपविभागातील वरिष्ठ सहाय्यक लिपिक नाना कोरडे याने ग्रामीण पाणीपुरवठा विभागातील कर्मचाऱ्यांच्या खात्यात पगारव्यतिरिक्त इतर फरकाची रक्कम दाखवून सदर फरकाची रक्कम आपल्या व पत्नीच्या खात्यात वळती करून हा गैरव्यवहार केला आहे. हा गैरव्यवहार करताना धनादेशांवर वरिष्ठ अधिकाऱ्यांच्या बनावट सह्या केल्या आहेत. या गैरव्यवहाराची चौकशी करण्यासाठी जिल्हा परिषदेचे मुख्य कार्यकारी अधिकारी यांनी उपमुख्य लेखा व वित्त अधिकारी महादेव टेळे यांच्या अध्यक्षतेखाली पाच सदस्यीय समिती स्थापन केली आहे.

आधीच्या खात्यात घोटाळा केलाय का?

नाना कोरडे हा आधी महिला व बालविकास विभागाच्या अलिबाग व म्हसळा प्रकल्प येथे 2020 पासून कार्यरत होता. या ठिकाणीही त्याने असाच गैरव्यवहार केला आहे का? याची तपासणी समितीचे सदस्य करीत असल्याची माहिती डॉ. भरत बास्टेवाड यांनी दिली.