मित्राला पैशांची गरज होती.. ‘ती’ ने आईच्या हत्येची सुपारीच दिली

मित्राला पैशांची गरज असल्याने मुलीनेच आपल्या जन्मदात्या आईच्या हत्येची दहा लाखांची सुपारी दिल्याची धक्कादायक बाब उघडकीस आली आहे. प्रिया नाईक असे हत्या झालेल्या दुर्दैवी आईचे नाव आहे. आई मोबाईलवर दुर्दैवी प्रिया नाईक सतत लक्ष ठेवून असते तसेच बाहेर येण्या-जाण्याला रोखते याचाच राग मनात ठेवून मुलगी प्रणाली हिने आपल्या मित्रांच्या मदतीने आईला संपवले. याप्रकरणी पनवेल शहर पोलिसांनी मुलगी प्रणालीसह तिचे मित्र विवेक पाटील व विशाल पांडे यांना बेड्या ठोकल्या आहेत.

प्रिया नाईक यांची मुलगी प्रणाली ही विवाहित असून तिला पाच वर्षांची मुलगी आहे. मात्र पतीसोबत भांडण झाल्याने गेल्या दोन वर्षांपासून ती माहेरी आपल्या आईवडिलांकडे राहण्यास आली होती. पतीला सोडल्यानंतर प्रणालीच्या आईने तिच्या बाहेर येण्या-जाण्यावर तसेच सतत फोनवर बोलण्यास बंधने घातली. प्रणाली घराबाहेर गेल्यानंतर तिला सतत फोन करून विचारणा करणे, मोबाईल फोन तपासणे या सगळ्या गोष्टींना ती वैतागली होती. दरम्यान प्रणालीचा मित्र व मानलेला भाऊ विवेक पाटील याने तिला पैशांची गरज असल्याचे सांगत मदत करण्यास सांगितले. त्यावेळी आईच्या निर्बंधातून सुटकेसाठी प्रणालीने आईला संपवण्याचा कट रचला आणि विवेकला 10लाख रुपये देण्याचे आश्वासन देऊन थेट आईच्या हत्येची सुपारी दिली.

वायरने गळा आवळला
प्रणालीचे वडील प्रल्हाद नाईक हे कामावर गेल्यानंतर विवेक व त्याचा मित्र विशाल पांडे हे प्रणालीच्या घरी गेले व प्रिया या एकट्या असल्याची संधी साधत वायरने त्यांचा गळा आवळून हत्या केली. सुरुवातीला पनवेल पोलिसांनी प्रिया यांच्या अकस्मात मृत्यूची नोंद केली. मात्र पोस्टमार्टम रिपोर्टनंतर पोलिसांनी हत्येचा गुन्हा दाखल करून तपास केला व प्रणाली नाईक, विवेक पाटील व विशाल पांडे या तिघांना अटक केली. पनवेल न्यायालयाने त्या तिघांना 23 सप्टेंबरपर्यंत पोलीस कोठडी सुनावली आहे.