पश्चिम बंगालच्या मुख्यमंत्री आणि तृणमूल काँग्रेसच्या प्रमुख ममता बॅनर्जी हेलिकॉप्टरमध्ये बसताना पडल्या. यामुळे त्यांना किरकोळ दुखापत झाली आहे. दुर्गापूर येथे ही घटना घडल्याची माहिती ‘एएनआय’ या वृत्तसंस्थेने व्हिडीओ शेअर करत दिली आहे.

लोकसभा निवडणुकीची रणधुमाळी सुरू असून पश्चिम बंगालमध्ये तृणमूल काँग्रेस स्वबळावर लढत आहे. टीएमसीने शत्रुघ्न सिन्हा यांना आसनसोल मतदारसंघातून तिकीट दिले आहे. त्यांच्या प्रचारासाठी ममता बॅनर्जी दुर्गापूर येथून आसनसोलच्या दिशेने निघाल्या होत्या. येथे त्या एका सभेला संबोधित करणार होत्या. मात्र हेलिकॉप्तरमध्ये बसताना त्यांचे संतुलन बिघडले आणि त्या पडल्या. सुरक्षारक्षकाने तात्काळ मदत केल्याने ममता बॅनर्जी सावरल्या. त्यांची दुखापत गंभीर नसल्याची माहिती मिळत असून त्या आसनसोलकडे रवाना झाल्या आहेत.

 

View this post on Instagram

 

A post shared by Saamana (@saamana_online)

दरम्यान, काही दिवसांपूर्वीही ममता बॅनर्जी यांच्या डोक्याला दुखापत झाली होती. घरामध्ये ट्रेडमिलवर चालताना त्या कोसळल्या होत्या आणि यामुळे त्यांच्या डोक्याला कोच पडली होती. त्यानंतर त्यांना तात्काळ दवाखान्यात दाखल करण्यात आले. येथे त्यांच्या जखमेवर तीन टाके घालण्यात आले होते. त्यानंतर त्यांना डिस्चार्ज देण्यात आला.