दुकानांपाठोपाठ म्हाडाच्या मुंबईतील 17 भूखंडाचा लिलाव आता लांबणीवर पडला आहे. इच्छुकांना आता 7 मेपर्यंत निविदा सादर करता येणार असून जूनच्या पहिल्या आठवडय़ात ई-लिलाव पार पडेल, अशी माहिती सूत्रांनी दिली. यापूर्वी निविदा सादर करण्याची मुदत 26 एप्रिलपर्यंत होती.

म्हाडाने मार्चमध्ये मुंबईतील मोक्याच्या ठिकाणच्या 17 भूखंडांच्या विक्रीसाठी जाहिरात प्रसिद्ध करण्यात आली होती. मालाड-मालवणी, चारकोप, विक्रोळीतील टागोरनगर आणि कन्नमवार नगर, शीव येथील प्रतीक्षा नगर आणि जोगेश्वरी ओशिवरा येथील भूखंडांची विक्री लिलाव पद्धतीने करण्यात येणार असून या माध्यमातून म्हाडाला तब्बल 375 ते 400 कोटी रुपयांचा महसूल मिळण्याची शक्यता आहे. विशेष म्हणजे रुग्णालय, प्राथमिक शाळा, महाविद्यालय, खेळाचे मैदान, बहुद्देशीय समाज हॉल यासाठी हे भूखंड आरक्षित असून त्या आरक्षणानुसारच या भूखंडाचा वापर करता येणार आहे.

 एक टक्के अनामत रक्कम भरावी लागणार

विविध क्षेत्रफळाच्या या भूखंडाच्या विक्रीसाठी म्हाडाने 45 हजार 300 रुपये प्रति चौरस मीटर ते 1 लाख 6 हजार 170 रुपये प्रति चौरस मीटर दराने बोली निश्चित केली आहे. सर्वाधिक बोली लावणाऱयांना हे भूखंड वितरित करण्यात येतील. इच्छुकांना बोली रकमेच्या एक टक्के अनामत रक्कम इच्छुकांना भरावी लागणार आहे.