जगभरातून महत्त्वाच्या घडामोडी…

रेल्वेत 11,548 पदांसाठी भरती

रेल्वे भरती मंडळांनी आरआरबी एनटीपीसी 2024 अंतर्गत नॉन टेक्निकल पदासाठी भरतीची घोषणा केली. पदवीधर-स्तरीय पदांसाठी इच्छुक उमेदवार 14 सप्टेंबर ते 13 ऑक्टोबर 2024 पर्यंत ऑनलाइन अर्ज करू शकतात. अंडरग्रॅज्युएट-स्तरीय पोस्टसाठी ऑनलाइन अर्ज प्रक्रिया 21 सप्टेंबर ते 20 ऑक्टोबर 2024 पर्यंत खुली असेल.

उद्यापासून चार दिवस बँका बंद

बँकेसंबंधित काही कामे असतील तर ती लवकर करून घ्या. कारण उद्या शनिवारपासून बँका सलग चार दिवस बंद राहणार आहेत. 14 सप्टेंबरला दुसरा शनिवार, 15 सप्टेंबरला रविवार, 16 सप्टेंबरला सोमवारी ईद-ए-मिलाद आणि 17 सप्टेंबरला मंगळवारी अनंत चतुर्दशी म्हणजे सार्वजनिक गणेशमूर्ती विसर्जन आहे. त्यामुळे बँका बंद राहणार आहेत.

आय ड्रॉप प्रेस्वूवर बंदी

डोळ्यांचा चष्मा घालवण्याचा दावा करणाऱया आय ड्रॉप प्रेस्वूवर बंदी घालण्यात आली आहे. हिंदुस्थानी बाजारात उपलब्ध होण्याआधीच यावर बंदी घातली गेली आहे. या ड्रॉपने दृष्टिदोष कमी होऊन चष्मा कायमचा सुटू शकतो. याच्या नियमित वापरानंतर चष्मा वापरण्याची गरज भासणार नाही, असा दावा करण्यात आला होता.

हिंदुस्थानी तरुणाची इस्रायलमध्ये हत्या

इस्रायल आणि हमास यांच्यातील युद्धाला आता एक वर्ष पूर्ण होईल. येथील तणाव अद्याप कमी झालेला नाही. इस्रायलमध्ये मूळचा हिंदुस्थानी असलेल्या एका 24 वर्षीय तरुणाची हत्या करण्यात आली. गेरी गिदोन हंघल असे या तरुणाचे नाव असून तो इस्रायली सैनिक म्हणून काम करत होता. तो 2020 पासून इस्रायलमध्ये राहत होता.